Friday, July 20, 2018

தமிழில் நீட் தேர்வு எழுதியவர்களுக்கு கருணை மதிப்பெண்கள் வழங்க தடை

SHARE:
தமிழில் நீட் தேர்வு எழுதியவர்களுக்கு கருணை மதிப்பெண்கள் வழங்க தடை விதித்து உச்ச நீதிமன்றம் உத்தரவிட்டுள்ளது.

தமிழில் நீட் தேர்வு எழுதிய மாணவ, மாணவிகளுக்கு தவறான மொழி பெயர்ப்புக்காக கருணை மதிப்பெண் வழங்கக் கோரி மார்க்சிஸ்ட் எம்.பி. டி.கே.ரங்கராஜன் உயர் நீதிமன்ற கிளையில் பொதுநல மனு தாக்கல் செய்திருந்தார்.

இந்த மனு மீதான விசாரணை நடத்திய நீதிமன்றம், நீட் தேர்வில் பிழையான ஒரு கேள்விக்கு தலா 4 மதிப்பெண்கள் வீதம், பிழையான 49 கேள்விகளுக்கு 96 மதிப்பெண்களை கருணை மதிப்பெண்களாக சிபிஎஸ்இ வழங்க வேண்டும். கருணை மதிப்பெண் வழங்கி மருத்துவ படிப்புக்கு 2 வாரத்திற்குள் புதிதாக தரவரிசைப் பட்டியல் வெளியிட்டு மாணவர் சேர்க்கை நடத்த வேண்டும் என உத்தரவிட்டது. இதனை எதிர்த்து சிபிஎஸ்இ உச்ச நீதிமன்றத்தில் மேல் முறையீடு செய்தது.

முன்னதாக, இந்த வழக்கில் சிபிஎஸ்இ மேல்முறையீடு செய்தால் தனது தரப்பு விளக்கங்களை கேட்க வேண்டும் என டி.கே.ரங்கராஜன் சார்பில் உச்ச நீதிமன்றத்தில் கேவியட் மனுத் தாக்கல் செய்யப்பட்டிருந்தது.

இந்நிலையில், சிபிஎஸ்இ தாக்கல் செய்த மேல்முறையீட்டு மனு மீது விசாரணை நடத்திய உச்ச நீதிமன்றம், நீட் தேர்வில் பிழையான கேள்விகளுக்கு கருணை மதிப்பெண் வழங்க வேண்டும் என்ற உயர் நீதிமன்ற கிளையின் தீர்ப்புக்கு இடைக்காலத்தடை விதித்து உத்தரவிட்டுள்ளது. மேலும், தமிழகத்தில் 2-ம் கட்ட கலந்தாய்வை நடத்த அனுமதி அளித்து உத்தரவிட்ட உச்ச நீதிமன்றம், மனு குறித்து சிபிஎஸ்இ விளக்கமளிக்க நோட்டீஸ் அனுப்பவும் உத்தரவிட்டுள்ளது.
SHARE:

0 comments: