Saturday, October 13, 2018

காசாவிற்கான எரிபொருள் விநியோகத்தை நிறுத்துமாறு இஸ்ரேல் அதிரடி உத்தரவு

காசா எல்லை பகுதிக்கான எரிபொருள் விநியோகத்தை உடனடியாக நிறுத்துமாறு இஸ்ரேல் பாதுகாப்பு அமைச்சர் அவிக்டோர் லிபர்மன் உத்தரவிட்டுள்ளார்.

காசா எல்லையில் அதிகரித்துவரும் இஸ்ரேல் படையினர் மற்றும் பொதுமக்கள் மீதான தாக்குதல்களின் எதிரொலியாக நேற்று (வெள்ளிக்கிழமை) இந்த அறிவிப்பு வெளியிடப்பட்டுள்ளது.

மேலும், இஸ்ரேல் படையினருக்கு எதிரான பயங்கரவாத மற்றும் வன்முறை நடவடிக்கைகள் அதிகரித்துவரும் நிலையை இஸ்ரேல் சகித்துக் கொள்ளாது என்றும், இந்நிலை மாறும்வரை காசாவிற்கு எரிபொருள் தாங்கிகளை அனுமதிக்கப் போவதில்லை என்றும் பாதுகாப்பு அமைச்சின் அறிக்கையில் குறிப்பிடப்பட்டுள்ளது.

இதேவேளை, இஸ்ரேலின் முற்றுகைக்குட்பட்ட காசா எல்லையில் போராட்டத்தில் நேற்று நடைபெற்ற ஆர்ப்பாட்டத்தின்போது இஸ்ரேல் படையினரால் ஆறு பலஸ்தீனியர்கள் கொல்லப்பட்டனர்.

எல்லையில் கூடியிருந்த ஆயிரக்கணக்கான பலஸ்தீனியர்கள் இஸ்ரேல் படையினரை நோக்கி கற்கள் மற்றும் வெடிப்பொருட்களை வீசி வன்முறையில் ஈடுபட்ட நிலையிலேயே தாம் பதில் தாக்குதல் நடத்தியதாக இஸ்ரேல் தரப்பினர் தெரிவித்துள்ளனர்.

1948ஆம் ஆண்டு இஸ்ரேல் தனிநாடாக உருவாக்கப்படுவதற்கு முன்னர் தமது கிராமங்கள் மற்றும் நகரங்களில் வாழ்ந்த பலஸ்தீனர்களுக்கு அங்கு திரும்புவதற்கு உரிமை கோரி கடந்த மார்ச் 30ஆம் திகதி முதல் முன்னெடுக்கப்பட்டுவரும் ஆர்ப்பாட்டங்களின் போதான வன்முறையில் இதுவரை 200 பலஸ்தீனியர்கள் கொல்லப்பட்டுள்ளமை குறிப்பிடத்தக்கது.
SHARE:

0 comments: