Saturday, October 13, 2018

அநுராதபுரம் சிறைச்சாலைக்கு முன்பாக யாழ். மாணவர்கள் ஆர்ப்பாட்டம்!

தமிழ் அரசியல் கைதிகளின் விடுதலைக்காக அநுராதபுரம் சிறைச்சாலைவரை நடைபவனியாகச் சென்ற யாழ். பல்கலைக்கழக மாணவர்கள், தற்போது சிறைச்சாலைக்கு முன்பாக ஆர்ப்பாட்டத்தில் ஈடுபட்டுள்ளனர்.

‘நல்லிணக்க அரசே! நிபந்தனையின்றி உடன் அரசியல் கைதிகளை விடுதலை செய். இதேபோன்று பல கிளர்ச்சியாளர்கள் இலங்கை அரசினால் விடுதலை செய்யப்பட்டுள்ளார்கள். ஏன் பாரபட்சம்? நாம் தமிழர்கள் என்பதாலா?’ என்ற வாசகம் தாங்கிய பதாதையை ஏந்தியவாறு மாணவர்கள் ஆர்ப்பாட்டத்தில் ஈடுபட்டுள்ளனர்.

அநுராதபுரம் சிறைச்சாலையில் உண்ணாவிரதமிருக்கும் தமிழ் அரசியல் கைதிகளின் கோரிக்கைக்கு, அரசாங்கம் எவ்வித பதிலையும் வழங்கவில்லை. இந்நிலையில், கடந்த 9ஆம் திகதி யாழ். பல்கலைக்கழக வளாகத்தில் ஆரம்பமான நடைபயணம் இன்று அநுராதபுரம் சிறைச்சாலையை அடைந்துள்ளது.

அங்கு சில மாணவர்களுக்கு அரசியல் கைதிகளை சந்திக்க அனுமதி வழங்கப்பட்டதோடு, எஞ்சிய மாணவர்கள் சிறைச்சாலை முன்பாக ஆர்ப்பாட்டத்தில் ஈடுபட்டுள்ளனர்.

பயங்கரவாத தடைச்சட்டத்தின் கீழ் கைதுசெய்யப்பட்ட தம்மை விடுவிக்குமாறு கடந்த செப்டெம்பர் மாதம் 14ஆம் திகதி 8 தமிழ் அரசியல் கைதிகள் அநுராதபுரம் சிறைச்சாலையில் உண்ணாவிரத போராட்டத்தை ஆரம்பித்தனர். இவர்களில் சிலரது உடல்நிலை கவலைக்கிடமாக உள்ள நிலையில், சிறைச்சாலை வைத்தியசாலையில் அனுமதிக்கப்பட்டுள்ளனர்.

இதேவேளை, கொழும்பு மகசீன் சிறைச்சாலை மற்றும் கண்டி போகம்பர சிறைச்சாலையில் தடுத்துவைக்கப்பட்டுள்ள தமிழ் அரசியல் கைதிகளும் கடந்த ஒரு வார காலமாக உண்ணாவிரத போராட்டத்தில் ஈடுபட்டு வருகின்றமை குறிப்பிடத்தக்கது.
SHARE:

0 comments: