Saturday, October 13, 2018

பிரித்தானிய அரசாங்கம் ரஷ்யாவை இழிவுபடுத்த முயற்சி!- ரஷ்ய தூதுவர்

ரஷ்ய முன்னாள் உளவாளி ஸ்கிரிபாலை கொலை செய்ய முயற்சித்தமை மற்றும் உலகளாவிய ரீதியில் பல்வேறு அமைப்புகளை ஹெக் செய்ய முயற்சித்தமை தொடர்பாக ரஷ்ய இராணுவ புலனாய்வு பிரிவின் உளவாளிகள் மீது சுமத்தப்பட்டுள்ள குற்றச்சாட்டுகளை பிரித்தானியாவிற்காக ரஷ்ய தூதுவர் அலெக்சான்டர் யகோவென்கோ மறுத்துள்ளார்.

மேலும், பிரித்தானிய அரசாங்கம் ரஷ்யாவை இழிவுபடுத்தும் பிரசாரத்தை முன்னெடுக்க முயற்சிப்பதாகவும் அவர் குறிப்பிட்டார்.

ஸ்கிரிபால் கொலை சதி தொடர்பாக ஷ்ய இராணுவ புலனாய்வு பிரிவினர் மீது குற்றம்சாட்டப்பட்டுள்ளமை தொடர்பாக எழுப்பப்பட்ட கேள்விகளுக்கு நேற்று (வெள்ளிக்கிழமை) பதிலளிக்கையிலேயே அவர் இவ்வாறு தெரிவித்தார்.

அங்கு தொடர்ந்து தெரிவித்த அவர், ”ரஷ்யாவிற்கும் பிரித்தானியாவிற்கும் இடையிலான உறவு தற்போது மிகவும் கீழ் மட்டத்தில் காணப்படுகிறது.

சலிஸ்பரி சம்பவம் உள்ளிட்ட விடயங்கள் காரணமாக இருதரப்பு மற்றும் சர்வதேச ஒப்பந்தங்களை மீறியும், ரஷ்ய அதிகாரிகளுடன் ஒத்துழைக்க மறுத்தும் பிரித்தானிய கொன்சவேற்றிவ் அரசாங்கம் ஆக்கபூர்வமற்ற முறையில் செயற்பட்டு வருகிறது.

அதுமாத்திரமின்றி பிரித்தானியாவில் எமது இராஜதந்திர நடவடிக்கைகளை முறையாக செயற்படுத்துவதில் தடையேற்படுத்தும் வகையிலான தீர்மானங்களை பிரித்தானிய அதிகாரிகள் முன்னெடுத்து வருகின்றனர். இவ்வாறான நடவடிக்கைகளுக்கு நாம் நடவடிக்கை எடுக்க வேண்டும்” எனத் தெரிவித்தார்.
SHARE:

0 comments: