Saturday, June 9, 2018

பெண் ஒருவரைக் கழுத்தறுத்துக் கொல்ல முயற்சி - பாட்டாளிபுரத்தில் கண்டனப் போராட்டம்

பெண் ஒருவரைக் கழுத்தறுத்துக் கொல்ல முயற்சி - பாட்டாளிபுரத்தில் கண்டனப் போராட்டம்


பாட்டாளிபுரத்தில் பெண்பொருவரைக் கழுத்து அறுத்துக் கொலைசெய்ய மேற்கொள்ளப்பட்ட முயற்சியைக் கண்டித்து இன்று (9.6.2018) காலை 10 மணிக்கு பாட்டாளிபுரம் நாகம்மாள் கோவிலுக்கு முன்பாக கவனயீர்ப்புப் போராட்டமொன்று நடாத்தப்பட்டது.

தமிழ்த் தேசிய மக்கள் முன்னணியின்  ஏற்பாட்டில் நடைபெற்ற இக்கவனயீர்ப்புப் போராட்டத்தில்  மக்கள் அணிதிரளாதிருக்கும் பொருட்டு பொலிசார் வீடு வீடாக போராட்டத்திற்குச் செல்ல வேண்டாம் எனத் தடுத்திருந்தனர்.

எனினும் மக்கள் அமைப்புக்களின் பிரதிநிதிகளும் அரசியல் கட்சி உறுப்பினர்களும் இப்போராட்டத்தில் கலந்துகொண்டனர்.

இப்போராட்டத்தில் கலந்துகொண்ட தமிழ்த் தேசிய மக்கள் முன்னணியின் திருகோணமலை மாவட்ட அமைப்பாளர் இரா.சிறீஞானேஸ்வரன் ஊடகங்களுக்குக் கருத்துத் தெரிவிக்கையில் இக்கொலைமுயற்சி தொடர்பாக காவல்துறை கவலையீனமாகச் செயற்படுவதுடன் இப்போராட்டத்தை தடுக்க முற்பட்டதன் அடிப்படையில் பார்த்தால் பொலிசார் கொலையாளிகளைத் தப்பவைக்க முயற்சிப்பதான சந்தேகம் எழுகின்றது என்றும், அச்சந்தேகத்தை நீக்கி கொலைமுயற்சியாளர்களையும் அதற்கு உடந்தையானவர்களையும் சட்டத்தின் முன்நிறுத்தி கொலைமுயற்சிக்குள்ளான பெண்ணுக்கு நீதியைப் பெற்றுக் கொடுப்பதுடன் கிராமத்திலுள்ள மக்கள் நிம்மதியாக வாழ வழி செய்ய வேண்டும் என்றும் கேட்டுக்கொண்டார்.

இப்போராட்டத்தில் தமிழ்த்தேசிய மக்கள் முன்னணியின் மூதூர் பிரதேசசபை உறுப்பினர் திரு.சத்தியரூபன், வெருகல் பிரதேசசபை உறுப்பினர் திரு. சிவனேசன், மாவட்டச் செயலாளர் திரு.குகன், வட்டார இணைப்பாளர்கள் கரன் மற்றும் கணேஸ் தமிழ்த் தேசியக் கூட்டமைப்பின் கட்டைபறிச்சான் வட்டாரப் பிரதேசசபை உறுப்பினர் திருமதி. காருண்யா , பாட்டாளிபுர சனசமூக நிலைய உறுப்பினர் திரு.பண்பரசன் மற்றும் மக்கள் கலந்துகொண்டனர்.




வடக்கின் கடல்வளம் வடக்கு மக்களுக்கானதே

வடக்கின் கடல்வளம் வடக்கு மக்களுக்கானதே



வடமாகாணத்தில் உள்ள கடற்றொழில் நீரியல் வளத்துறை வளங்களை வடமாகாணத்தை சேர்ந்த மீனவர்களே பயன்படுத்த வேண்டும் என யாழ். வணிகர் கழகம் கோரிக்கை விடுத்துள்ளது.

இது தொடர்பாக வணிகர் கழகம்அனுப்பி வைத்துள்ள செய்தி குறிப்பில், வடமாகாணத்தில்உள்ள தீவுப்பகுதிகள் உட்பட, கடற்ரையோரங்களில் இனம் காணப்பட்ட சில இடங்களை நீர்வாழ் உயிரினவளர்ப்புக்கலான இடங்களாக கடற்றொழில் மற்றும் நீரியல் வளங்கள் அமைச்சினால் இனங்காணப்பட்டு, வர்த்தமானியில் பிரசுரிக்கப்பட்டுள்ளது. ஆகையால் இந்த இடங்களை எமது வடமாகணத்தைச் சேர்ந்த முதலீட்டாளர்களும், வடமாகாணத்தைச் சேர்ந்த மீனவசங்கங்களின் சமாசங்கள் மற்றும் ஆர்வமுள்ளோரும் பயன்படுத்தவேண்டும் என நாம் எதிர்பார்க்கின்றோம்.

கொழும்பில் உள்ள சில மூதலீட்டாளர்கள் கடற்றொழில் மற்றும் நீரியல் வளங்கள் அமைச்சிடம் அனுமதியை பெற்று வர்த்தக முயற்சிகளில் ஈடுபட முயல்கின்றனர் . இதுஇவை தமிழர்களிற்குரிய வளங்கள் வளங்கள், அத்துடன் இது எமது பிரதேசத்தைச் சேர்ந்த இடங்கள். ஆகையால் எமது மக்கள் இதனை விரைவாக பயன்படுத்த வேண்டும் என்று கேட்டக்கொள்வதுடன், இதற்கான விண்ணப்பங்களை நீங்கள் தெரிவு செய்து இடங்களை குறிப்பிட்டு கடற்றொழில் நீரியல்துறை அமைச்சிடமும் துறை அமைச்சிடமும் மாகாண அமைச்சிடமும்; விரைவாக விண்ணப்பிக்க வேண்டுகிறோம்.

இத்திட்டத்தில் மூலம் எமது பிரதேச வளங்களை பயன்படுத்தும் கிராம மட்ட பொருநாதாரம் உயர்வடைவதுடன், எமது மாகாணமும் பொருளாதார ரீதியில் முன்னேற்றம் அடையும் என எதிர்பார்க்கின்றோம் என அதில் குறிப்பிடப்பட்டுள்ளது.
வடகிழக்கு இணைந்த தாயகம்: கிழக்கு தமிழர் ஒன்றியம்!

வடகிழக்கு இணைந்த தாயகம்: கிழக்கு தமிழர் ஒன்றியம்!

வடக்கு கிழக்கு இணைந்த தாயகம் தான் தமிழர்களின் தீர்வென்பதனை ஏற்றுக்கொள்கின்றோம் என கிழக்கு தமிழர் ஒன்றியத்தின் இணைப்பாளரான சிரேஸ்ட சட்டத்தரணி த.சிவநாதன் தெரிவித்துள்ளார்.

இன்றைய தினம் சனிக்கிழமை மட்டக்களப்பு முகத்துவாரத்திலுள்ள சூழலியல் கற்கைகள் நிலைய மண்டபத்தில் கிழக்குத் தமிழர் ஒன்றியத்தின் செயற்பாடுகள் குறித்து நடைபெற்ற ஊடக சந்திப்பில் இவ்வாறு தெரிவித்துள்ளார்.

கிழக்கு தமிழர் ஒன்றியம் கிழக்குக்கு மாத்திரமானதோ வடக்குக் கிழக்கு இணைப்புக்கு எதிரானதொரு சக்தியோயல்ல நாங்கள் வடக்கு கிழக்கு இணைந்த தாயகம் தான் தமிழர்களின் தீர்வென்பதனை ஏற்றுக் கொள்கின்றோம்.

ஆனால் அது கிடைக்கப்பெறும் வரையில் கிழக்கு மாகாணத்தினை கிழக்கு மாகாணமாக வைத்துக் கொள்ள வேண்டும், அப்போது தான் ஏதாவது நன்மையிருக்கும் என்று கிழக்கு தமிழர் ஒன்றியத்தின் இணைப்பாளர்களான சிரேஸ்ட சட்டத்தரணி த.சிவநாதன் , செங்கதிரோன், த.கோபாலகிருஸ்ணன் ஆகியோர் தெரிவித்துள்ளனர்.

குறித்த ஊடக சந்திப்பில், கிழக்கு தமிழர் ஒன்றியத்தின் தலைவர் பேராசிரியர் மா. செல்வராஜா, செயலாளர் எந்திரி வ.பரமகுருநாதன், ஊடக இணைப்பாளர் த.ஈஸ்வரராஜா உள்ளிட்டோரும் பங்கெடுத்திருந்தனர்.
புறப்பட்டது முன்னணி: மக்கள் சந்திப்புக்கள் ஆரம்பம்!

புறப்பட்டது முன்னணி: மக்கள் சந்திப்புக்கள் ஆரம்பம்!


உள்ளுராட்சி தேர்தலின் பின்னராக ஓய்ந்திருந்த தமிழ் தேசிய மக்கள் முன்னணி மீண்டும் அரசியல் விழிப்புணர்விற்கான மக்கள் சந்திப்புகளை ஆரம்பித்துள்ளது. இன்றைய தினமான சனிக்கிழமை பருத்தித்துறை,மற்றும் கரவெட்டி பகுதிகளினில் மக்கள் மற்றும் ஆதரவாளர் சந்திப்புக்களை முன்னணி ஆரம்பித்துள்ளது.

வெளிப்படையான அரசியல் விழிப்புணர்வு கலந்துரையாடல்கள் தாயகத்தின் பல்வேறு பகுதிகளிலும் ஒழுங்குபடுத்த தாம் திட்டமிட்டுள்ளதாக முன்னணி அறிவித்துள்ளது.

இச்சந்திப்புக்களில் அதன் தலைவர் கஜேந்திரகுமார் பொன்னம்பலம்,செல்வராசா கஜேந்திரன்,வி.மணிவண்ணன் உள்ளிட்டவர்கள் பங்கெடுத்துவருகின்றனர்.

நடந்து முடிந்த உள்ளுராட்சி தேர்தலில் பெரும் வெற்றியை முன்னணி சந்தித்திருந்த நிலையில் கூட்டமைப்பு தனது பின்னடைவு தொடர்பில் ஆராய்ந்துவருவது குறிப்பிடத்தக்கதாகும்.

மலசலகூடத்திற்குள் இருந்து ஆண் ஒருவரின் சடலம் மீட்பு

மலசலகூடத்திற்குள் இருந்து ஆண் ஒருவரின் சடலம் மீட்பு


மட்டக்களப்பு – களுவாஞ்சிகுடி பொலிஸ் பிரிவுக்குட்பட்ட பெரியகல்லாறில் வீடு ஒன்றின் மலசலகூடத்திற்குள் இருந்து ஆண் ஒருவரின் சடலம் மீட்கப்பட்டுள்ளது.

பெரியகல்லாறு ஜோர்ஜ் வீதியில் நிர்மாணிக்கப்பட்டு கொண்டிருக்கும் வீடு ஒன்றின் மலசல கூடத்திற்குள் இருந்தே இன்று காலை இந்த சடலம் மீட்கப்பட்டுள்ளது.

இவ்வாறு சடலமாக மீட்கப்பட்டவர், பெரியகல்லாறு பிரதான வீதியை சேர்ந்த 48 வயதுடைய சுரேந்திரன் என இனங்காணப்பட்டுள்ளதாக களுவாஞ்சிகுடி பொலிஸார் தெரிவித்தனர்.குறித்த நபர் தற்கொலை செய்து கொண்டாரா அல்லது யாராவது கொலை செய்தார்களா என்பது தொடர்பான விசாரணைகள் முன்னெடுக்கப்பட்டுள்ளதாக களுவாஞ்சிகுடி பொலிஸார் தெரிவித்தனர்.
அனந்தி சசிதரன் அவர்களினால் வாழ்வாதார உதவி வழங்கி வைப்பு!

அனந்தி சசிதரன் அவர்களினால் வாழ்வாதார உதவி வழங்கி வைப்பு!

வாதரவத்தை அக்காச்சி எழுச்சி கிராமத்தில் வாழ்வாதாரத்தை வலுப்படுத்தும் நோக்கில் வடமாகாண சமூக சேவைகள் அமைச்சர் அனந்தி சசிதரன் அவர்களினால் வாழ்வாதார உதவியாக இரு கண்களிலும்  பார்வையை இழந்து  வாழும்  நாகலிங்கம் தங்கராசா என்பவருக்கு   கோழிக்கூடு அமைத்து  கோழி குஞ்சுகள்  வழங்கி  வைக்கப்பட்டது 



வவுனியா குழந்தை கடத்தல் - 8 பேர் கொண்ட கும்பல் கைது

வவுனியா குழந்தை கடத்தல் - 8 பேர் கொண்ட கும்பல் கைது


வவுனியா, குட்ஷெட் வீதியில், முதலாவது குறுக்கு தெருவிலுள்ள வீடொன்றில் கடந்த 31ம் திகதி 8 மாத சிசு ஒன்றைக் கடத்திச் சென்ற சம்பவத்தில் 08 சந்தேகநபர்கள் நேற்று கைது செய்யப்பட்டுள்ளனர்.

மட்டக்களப்பு, ஏறாவூர் பிரதேசத்தில் வைத்து இவர்கள் கைது செய்யப்பட்டதாக வவுனியா பொலிஸார் தெரிவித்தனர்.

சம்பவத்தில் புதுக்குடியிருப்பு பிரதேசத்தைச் சேர்ந்த இரண்டு பெண்கள் ஏற்கனவே கைது செய்யப்பட்டனர்.

வசுதரன் வானிஷன் என்ற சிசு, கடந்த 31ம் திகதி வவுனியா, குட்ஷெட் வீதியில், முதலாவது குறுக்கு தெருவிலுள்ள வீடொன்றில் பலவந்தமாக நுழைந்த இனந்தெரியாத குழுவினால் கடத்திச் செல்லப்பட்டது.

குழந்தையின் தந்தை லண்டனில் இருப்பதாகவும், தந்தைக்கும் தாய்க்கும் இடையில் முரண்பாடு இருப்பதாகவும், இந்த முரண்பாடு காரணமாக தந்தையின் குழுவினரால் குழந்தை கடத்தப்பட்டிருக்கலாம் என்று குழந்தையின் தாய் கூறினார்.

அதன்படி ஆரம்பிக்கப்பட்ட தேடுதலில் குழந்தை மீட்கப்பட்டதாகவும், குழந்தையின் தந்தை விடுதலைப் புலிகள் இயக்கத்தில் புலனாய்வாளராக இருந்துள்ளதாகவும், பாதுகாப்பு தரப்பினர் தெரிவித்துள்ளனர்.

கைது செய்யப்பட்ட சந்தேகநபர்கள் வவுனியா நீதவான் நீதிமன்றில் ஆஜர் செய்யப்பட உள்ளனர்.
திங்கட்கிழமை கடையடைப்பு?

திங்கட்கிழமை கடையடைப்பு?

வடமராட்சி கிழக்கில் முன்னெடுக்கப்படும் திட்டமிடப்பட்ட தென்னிலங்கை மீனவர்களது அத்துமீறலை கண்டித்தும் அத்தகைய அத்துமீறலை நியாயப்படுத்தி அவர்களிற்கு அங்கீகாரம் வழங்கும் கூட்டமைப்பின் போல முகமூடிகளை கிழித்தெறியவும் கடையடைப்பு போராட்டமொன்றுக்கு அழைப்புவிடுக்கப்படலாமென தகவல்கள் தெரிவிக்கின்றன.


எதிர்வரும் திங்கட்கிழமை கடையடைப்பை முன்னெடுப்பது தொடர்பில் கடற்றொழில் அமைப்புக்கள் தீர்மானித்திருப்பதாக தெரியவருகின்றது.இது தொடர்பான உத்தியோகபூர்வ அறிவிப்பு இன்று மாலை வெளியாகுமென எதிர்பார்க்கப்படுகின்றது.

இதனிடையே போராட்டத்திற்கு ஆதரவு கோரி பல தரப்புக்களையும் கடற்றொழில் அமைப்புக்கள் சந்தித்துவருகின்றன.

முன்னதாக கடந்த வெள்ளிக்கிழமை சுமந்திரன் மற்றும் அவரது தொண்டரடிப்பொடிகள் நடத்திய கடற்றொழில் நீரியல் வளத்துறை அலுவலக முற்றுகைப்போராட்டத்தை கண்துடைப்பென கடற்றொழில் அமைப்புக்கள் தெரிவித்துள்ளன.

தென்னிலங்கை மீனவர்களிற்கு இங்கு அனுமதியில்லை.ஆனால் சுமந்திரன் போன்றவர்கள் சட்டரீதியாக அவர்கள் தங்க திட்டம் வகுத்துக்கொண்டிருக்கின்றனர்.தென்னிலங்கை மீனவர்களது வருகையின் சூத்திரதாரிகளுள் ஒருவரான அஸ்மின் நேற்றைய போராட்டத்தில் முன்னால் அமர்ந்திருக்கின்றார்.இதன் மூலம் இப்போராட்டம் எத்தகைய ஏமாற்று என்பது தெரிகின்றதெனவும் அவர்கள் கேள்வி எழுப்பியுள்ளனர். 
கண்டியில் இருவர் அதிரடிப்படையால் சுட்டுக்கொலை

கண்டியில் இருவர் அதிரடிப்படையால் சுட்டுக்கொலை



கண்டி, மடவளை பிரதேசத்தில் பொலிஸ் விஷேட அதிரடிப்படையினரால் இருவர் சுட்டுக்கொல்லப்பட்டுள்ளனர்.

இன்று (09) பகல் இந்த சம்பவம் இடம்பெற்றுள்ளது.

சுட்டுக்கொல்லப்பட்ட இருவரும் திட்டமிட்ட குற்றச் செயலில் ஈடுபடும் கும்பல் ஒன்றின் உறுப்பினர்கள் என பொலிஸ் ஊடகப் பேச்சாளர் ருவன் குணசேகர தெரிவித்துள்ளார்.

பிரபல பாதாள உலக குழுத் தலைவரான மாகந்துரே மதூஷின் குற்ற நடவடிக்கைகளை செய்து வந்த இருவரே உயிரிழந்திருப்பதாக தெரிவிக்கப்பட்டுள்ளது.
எங்கே செல்கின்றது யாழ்.சமூகம்?

எங்கே செல்கின்றது யாழ்.சமூகம்?

வல்வெட்டித்துறையின் நெடியகாடு பகுதியில் விளையாட்டு மைதானம் தொடர்பில் இளைஞர்களிடையே மூண்ட மோதலில் பத்திற்கும் அதிகமானவர்கள் வாள்வெட்டிற்குள்ளாகியுள்ளனர்.

விளையாட்டு மைதானத்தை பயன்படுத்துவது தொடர்பாக ஏறபட்ட வாக்குவாதம் பின்னர் கைகலப்பில் முடிந்துள்ளது.

தற்போதும் பதற்றம் தொடர்வதாக வல்வெட்டித்துறை காவல்துறை தெரிவித்துள்ளதுடன் பலரை கைது செய்துமுள்ளனர்.

காயமடைந்தவர்கள் வல்வெட்டித்துறை மற்றும் பருத்தித்துறை வைத்தியசாலையில் அனுமதிக்கப்பட்டுள்ளனர்.சிலர் மேலதிக சிகிச்சைக்காக யாழ்.போதனாவைத்தியசாலைக்கு மாற்றப்பட்டுள்ளனர்.  
மண்டைதீவு படுகொலை :32வது நினைவேந்தலில்!

மண்டைதீவு படுகொலை :32வது நினைவேந்தலில்!


1986 ஜீன் 10ம் திகதி குருநகர் துறையில் இருந்து தூயஒளி படகு 31 மீனவர்கனை சுமந்த படி புறப்பட்டது. முகத்துவாரம் வெளிச்சக்கூடு தாண்டி மண்டைதீவுக் கடலில் இறங்கினார்கள் மீனவர்கள். 27 பேர் கரையிறங்க நால்வர் படகில் நின்றனர். வலை வளைக்க ஆயத்தமாக மீனவர்கள் தயாராக பலவிதமான ஆயுதங்கள் பொருத்தப்பட்ட சிறியரக கப்பலில் முகமூடியணிந்தபடி வந்திறங்கினர் சிங்களக் கடற்படையினர். மீனவர்கள் அனைவரையும் கைகட்டித் தலைகுனிந்து நாரிமுட்டக்கடலில் நிற்கும்படி உறுமினார்கள்.

பின்பு கோடரி வாள் கத்தி பொல்லாலும் துவக்குப் பிடியாலும் வெட்டியும் கொத்தியும் அடித்தும் கொன்றனர் 31 பேரையும். மண்டைதீவு நீலக்கடல் எங்கும் பிணம் மிதந்து சிவப்பாய்ச் சுடர்ந்தது அன்று .நாளை 32ஆவது ஆண்டு நினைவுகளை குடும்பங்கள் நினைவுகூர்கின்றன.

ஆனால் அதே கடற்படையின் மூலம் தமக்கு வளலாய் பகுதியில் ஓய்வுவிடுதி கட்டியுள்ளது யாழ்.ஆயர் இல்லம்.

கொல்லப்பட்ட அனைத்து மீனவர்களும் கத்தோலிக்கர்கள் என்பதுடன் அவர்களது உடலங்கள் யாழ்.ஆயர் இல்லத்திற்கு அருகாகவுள்ள கொஞ்செஞ்சி மாதா சேமக்காலையில் அடக்கம் செய்யப்பட்டது குறிப்பிடத்தக்கது.
கூட்டமைப்பை எட்டி உதைத்துவிட்டார் ஜனாதிபதி!

கூட்டமைப்பை எட்டி உதைத்துவிட்டார் ஜனாதிபதி!

“ஜனாதிபதி மைத்திரிபால சிறிசேன அரியணையேறுவதற்கு ஏணியாக இருந்த தமிழ்த் தேசியக் கூட்டமைப்பை இன்று காலால் எட்டி உதைத்துள்ளார். இவ்வாறு தமிழ்த் தேசியக் கூட்டமைப்பின் நாடாளுமன்ற உறுப்பினர் சி.சிறிதரன் குற்றஞ்சாட்டினார்.
நாடாளுமன்றத்தில் நேற்று நடைபெற்ற தேசிய பாதுகாப்பு நிதியம் (திருத்தச்) சட்டமூலம் மீதான விவாதத்தில் கலந்துகொண்டு உரையாற்றுகையிலேயே அவர் இந்தக் குற்றச்சாட்டை முன்வைத்தார்.
“மஹிந்த ராஜபக்ஷ, மைத்திரிபால சிறிசேன ஆகிய இருவருமே தமிழ் மக்களுக்கு எதிரிகள்தான். எனவே, மோசமான எதிரியை மாற்றுவதற்காக ஆட்சிமாற்றத்துக்கு வாக்களிக்குமாறு தமிழ் மக்களிடம் தமிழ்த் தேசியக் கூட்டமைப்பு கோரிக்கை விடுத்தது. இவ்வாறு ஏணியாக இருந்தவர்களை எட்டி உதைக்கும் வகையில் ஜனாதிபதி இன்று செயற்பட்டுவருகிறார் என்பதை நாளாந்தம் வெளியாகும் செய்திகளிலிருந்து அறிந்துகொள்ளமுடிகின்றது.
எதிர்க்கட்சியில் இருக்கின்றபோதிலும் வடக்கு, கிழக்கு அபிவிருத்திகளில் பங்கேற்கவேண்டிய கடப்பாடு தமிழ்த் தேசியக் கூட்டமைப்புக்கு இருக்கின்றது. வடக்கு, கிழக்குக்கென ஜனாதிபதியால் விசேட செயலணியொன்று அமைக்கப்பட்டுள்ளது. எனினும், வடக்கு, கிழக்குக்கான விசேட செயலணியிலிருந்து அப்பகுதியைப் பிரிதிநிதித்துவப்படுத்தும் கட்சியான கூட்டமைப்பு ஒதுக்கப்பட்டுள்ளது; கவனத்தில் எடுக்கப்படாமல் விடப்பட்டுள்ளது. அதாவது, கூட்டமைப்பின் முகத்தில் தனது காலால் எட்டி உதைக்கும் வகையில் ஜனாதிபதி செயற்பட்டுள்ளார்.
அதேவேளை, இலங்கையில் இருக்கின்ற படைகளில் ஏனைய மாகாணங்களில் இல்லாதளவு வடக்கிலும், கிழக்கிலும் படையினர் குவிக்கப்பட்டுள்ளனர். படையினர் இனப்படுகொலையில் ஈடுபட்டனர் என்பது உலகறிந்த விடயம். சரத் பொன்சேகா உள்ளிட்ட தளபதிகளும் ஈடுபட்டனர். இவ்வாறு படுகொலைகளில் ஈடுபட்ட இராணுவம் மரம் வளர்ப்பு, வீடு கட்டுதல் போன்ற நடவடிக்கையில் ஈடுபட்டுவருகின்றது.
இரணைமடுக்குளத்துக்குப் பின்பகுதியில் பாரிய இராணுவக் குடியிருப்பு அமைக்கப்பட்டு வருகின்றது. இது ஏன் நடக்கின்றது? பல்வேறு இடங்களில் சிங்கள மக்கள் பலவந்தமாகக் குடிமயர்த்தப்படுகின்றனர்” எனத் தெரிவித்தார்.
வங்காலை தோமஸ்புரி படுகொலையின் 12 ஆம் ஆண்டு நினைவு நாள்!

வங்காலை தோமஸ்புரி படுகொலையின் 12 ஆம் ஆண்டு நினைவு நாள்!

மன்னாருக்கு தென் கிழக்கே வங்காலை பத்தாம் வட்டாரத்திலுள்ள தோமஸ்புரி கிராமத்தில் 2006 ஆம் ஆண்டு யூன் மாதம் 9 ஆம் திகதி வெள்ளிக்கிழமை அதிகாலை, இரு சிறுவர் உட்பட ஒரே குடும்பத்தைச் சேர்ந்த நால்வர் ஒரு வீட்டினுள் மிகக் கோரமாகப் படுகொலை செய்யப்பட்டனர்.

இலங்கை இராணுவத்தினர் தச்சுத் தொழிலாளியான மூர்த்தி மார்டின் (35 வயது) என்பவரது வீட்டினுள் நுழைந்து, வீட்டுக்காரரின் மனைவி மேரி மெட்டலினை (சித்திரா 27 வயது) பாலியல் வல்லுறவுக்குட்படுத்தி மிகக் கொடுமையாகச் சித்திரவதை செய்த பின்னர் பிள்ளைகளான ஆன் லக்ஸிகா (9 வயது) , ஆன் டிலக்ஸன் (7 வயது) மற்றும் தாய், தந்தை ஆகிய நான்கு பேரையும் மிகக் கொடூரமாகக் கொலை செய்து விட்டு சென்றனர்.

இந்தக் கொடூரச் சம்பவத்தால் வங்காலை மக்கள் மிகவும் கொந்தளித்து , குற்றவாளிகளைத் தங்களுக்குத் தெரியுமெனவும் அவர்களை உடனடியாக கைது செய்யுமாறும் முறையிட்டிருந்தனர்.

இப் பகுதியில் பல மாதங்களாக இது போன்ற அச்சமூட்டும் நிகழ்வுகள் தொடர்ந்ததால் தோமஸ்புரி கிராம மக்களில் மிகப்பெரும்பாலானோர் அந்நாட்களில் இரவு நேரங்களில் வங்காலை புனித ஆனாள், தேவாலயத்திற்குச் சென்று தங்கிவிட்டு அதிகாலையில் வீடு திரும்புவது வழமை.

எனினும், படுகொலை நடந்த வீட்டைச் சேர்ந்தவர்களும் இவர்களது உறவினர்களான நான்கு குடும்பங்களும் வேறு ஒரு சில குடும்பங்களும் இரவு நேரத்தில் இடம் பெயராது தங்கள் தங்கள் வீடுகளிலேயே தங்குவார்கள்.

இந்த நிலையில், கொலை நடக்க 2 நாட்களுக்கு முன்பு நான்கு இராணுவத்தினர், கொலை நடை பெற்ற வீட்டை மையமாக வைத்து வந்து அங்கும் அருகிலிருந்த ஒரு சில வீடுகளுக்கும் மட்டும் சென்று அங்கு இருப்போர் பற்றி அறிந்து சென்று அதன் பின் படுகொலை நிகழ்ந்த நாளன்று இந்த கோர நிகழ்வை திட்டமிட்டு அரங்கேற்றி உள்ளனர்.

மறு நாள் வெள்ளிக்கிழமை(09-06-2006) காலை ஏழு மணியாகியும் வீட்டிலிருந்த எவரும் வெளியே வராததால் பக்கத்து வீட்டிலிருந்த சகோதரி இவர்களது வீட்டுக்குச் சென்று முன் கதவைத் திறந்து பார்த்து கொடூர காட்சியாக கண்டு அலறியுள்ளார்.

இவரது சகோதரி, வீட்டின் வரவேற்பறையில் ஆடைகள் அலங்கோலமான நிலையில் மேரிமெட்டலின் (சித்திரா 27 வயது) இரத்த வெள்ளத்தில் இறந்து கிடந்தார்.

அப்பகுதியெங்கும் இரத்தம் உறைந்து போய்க் கிடந்தது. இவரது அலறல் சத்தத்தை கேட்டு ஏனையோர் அங்கு திரண்டு வந்து பார்த்தபோது, இறந்து கிடந்த பெண்ணின் உடலின் பல பகுதிகளிலும் பலத்த காயங்கள் காணப்பட்டதுடன் கூரான உளிகளால் குத்தி இவர் கொலை செய்யப்பட்டதும் தெரியவந்தது.

அத்துடன், இவர் கொலை செய்யப்பட முன்னர் சித்திரவதை செய்யப்பட்டதற்கான அடையாளங்களுமிருந்தன.

இதேநேரம், இவரது கணவரையும் இரு பிள்ளைகளையும் அங்கு தேடியபோது, அருகிலுள்ள அறையொன்றினுள் மூவரதும் சடலங்கள் சுருக்குக் கயிறுகளில் தொங்கிக் கொண்டிருந்தன.

அறையின் தரையில் பெருமளவு இரத்தம் உறைந்து போயிருந்தது.
மாட்டின் இவரது பிள்ளைகளான ஆன் லக்ஸிகா (9 வயது ) , ஆன் டிலக்ஸன் (7 வயது) ஆகியோரின் சடலங்களே, கயிற்றில் சுருக்கிடப்பட்டு வீட்டுக் கூரையில் தொங்க விடப்பட்டிருந்தன.

இவர்களது உடல்களிலும் பல இடங்களிலும் உளிகளால் மிக ஆழமாக குத்தப்பட்ட பல காயங்கள் காணப்பட்டன.

இந்தச் சம்பவம் பற்றிய தகவல் அப்பகுதியெங்கும் காட்டுத்தீபோல பரவவே அங்கு வங்காலைக் கிராமத்தைச் சேர்ந்த நாலாயிரத்துக்கும் மேற்பட்ட மக்கள் கூடியதுடன் அவர்கள் உணர்ச்சி வசப்பட்டும், கொந்தளித்தும் போயிருந்தனர்.

இது பற்றி அறிந்து அப்போதைய மன்னார் மாவட்ட மேலதிக நீதவான் ரி.ஜே. பிரபாகரன், மன்னார் ஆயர் வண. இராயப்பு ஜோசப் ஆண்டகை , மாவட்ட தமிழ்த்தேசியக் கூட்டமைப்பின் வன்னி மாவட்ட பாராளுமன்ற உறுப்பினர் எஸ். வினோ நோகராதலிங்கம், மன்னார் பிரதேச செயலர் திருமதி ஸ்ரான்லி டி. மெல், நானாட்டான் பிரதேச செயலர் என்.திருஞானசம்பந்தர், இராணுவ மற்றும் பொலிஸ் அதிகாரிகள், அரச சார்பற்ற நிறுவனங்களின் பிரதிநிதிகளென பெருமளவானோர் அங்கு வந்திருந்தனர்.
.
இதன்போது அங்கு கூடியிருந்த அனைத்து மக்களும், இராணுவத்தினரே இந்தக் கொடூரங்களைச் செய்ததாகவும் அவர்களைத் தங்களுக்குத் தெரியுமென முழங்கியதோடு வீட்டிற்கு வெளியே பல இடங்களிலும் காணப்பட்ட இராணுவச் சப்பாத்து அடையாளங்களையும் அங்கு கிடந்த இராணுவப் பொருட்கள் சிலவற்றையும் அனைவருக்கும் காண்பித்தனர்.

இதையடுத்து அனைத்து தடயப் பொருட்களையும் சேகரிக்குமாறு பொலிஸாருக்கு உத்தரவிட்ட நீதிபதி விசாரணைகளை மேற்கொண்ட பின், சடலங்களை பிரேத பரிசோதனைக்குட்படுத்துமாறும் பணித்தார்.

இதேநேரம், இந்தக் கொடூரச் செயலால் ஆத்திரமுற்ற ஆயிரக்கணக்கான மக்கள் ஆர்ப்பாட்டத்தில் ஈடுபட முனைந்ததால் அப்பகுதிக்கு பெருமளவு கலகத் தடுப்புப்பொலிஸாரும் இராணுவத்தினரும் கொண்டுவரப்பட்டு குவிக்கப்பட்டனர்.

எங்கும் பெரும் பதற்றம் நிலவிய அதேநேரம், தோமஸ்புரி மக்கள் கிராமத்திலிருந்து வெளியேறி வேறிடங்களுக்குச் செல்ல ஆரம்பித்தனர்.

இது போன்ற ஆயிரம் ஆயிரம் தமிழின படுகொலைகளுக்கு இன்றளவும் இலங்கை நீதி மன்றத்திலோ சர்வதேசத்திடம் இருந்தோ நீதி கிடைக்கவில்லை என்பதே தமிழர்களின் வரலாறு.

பேரவை சார்பில் விக்கினேஸ்வரன் வேட்பாளர்?

பேரவை சார்பில் விக்கினேஸ்வரன் வேட்பாளர்?

தமிழ் மக்கள் பேரவை அடுத்த மாகாண சபை தேர்தலில் தனது ஆதரவு வேட்பாளரை களமிறக்கலாமென வடமாகாண முதலமைச்சர் சி.வி.விக்கினேஸ்வரன் பூடகமாக கருத்து தெரிவித்துள்ளார்.

பேரவை சார்பில் ஒருவரையும் வேட்பானராக நியமிக்க மாட்டோம். ஆனால் பேரவையின் அனுசரணையில் யாராவது முதலமைச்சர் வேட்பாளராக வரக்கூடுமெனவும் அவர் தெரிவித்துள்ளார்.

இதேவேளை புதிய அரசியல் கட்சி ஒன்றை ஆரம்பிப்பது தொடர்பான முன்னே ற்றம் இடம்பெறுவதாக கூறப்படுகின்றதேயென்ற கேள்விக்கு பதிலளித்து அவர் முன்னேற்றம் ஒன்று நடைபெற் றுக்கொண்டு தான் இருக்கின்றது. ஆனால் அது கட்சி ரீதியானது என நான் பார்க்கவில்லையென தெரிவித்திருந்தார்.

அடுத்த மாகாண சபை தேர்த லில் நீங்கள் தமிழ் தேசிய கூட்டமைப்பின் சார்பில் போட்டியிடுவீர்களா என்ற கேள்விக்கு அவர் இல்லையென தலையாட்டியதுடன் 2013ஆம் ஆண்டு வடக்கு மாகாண சபையின் தேர்தலில் போட்டியிடுவேன் என்பது அதற்கு மூன்று மாத காலத்திற்கு முன்பு தான் தெரியும். எனவே அது அது அந் தந்த நேரத்தில் நடந்துள்ளது.இனியும் நடக்குமென முதலiமைச்சர் அர்த்தமுள்ள சிரிப்பொன்றுடன் தெரிவித்தார்.
தற்போது இது தொடர்பாக உறுதியாக எதனையும் கூற முடியாது. தமிழ்த் தேசிய கூட்டமைப்பில் அடுத்த மாகாண சபை தேர்தலில் போட்டியிடுவதா இல்லையா என்பது தொடர்பாக உரிய நேரத்தில் உரிய பதிலை தெளிவாக கூறுவேன் என்றார்.

கூப்பிட்டால் ஆமி வரவில்லை:கூட்டமைப்பு கவலை!

கூப்பிட்டால் ஆமி வரவில்லை:கூட்டமைப்பு கவலை!

கூட்டமைப்பின் நாடாளுமன்ற உறுப்பினர்கள் அழைத்தால் அவ்வப்பகுதி இராணுவ,கடற்படை தளபதிகள் சந்திப்பிற்கு செல்லவேண்டுமென அரசு தெரிவித்துள்ளது.


ஆனால் படை அதிகாரிகள் தம்மை மதிப்பதேயில்லையென நாடாளுமன்ற உறுப்பினர்கள் தரப்பில் தெரிவிக்கப்பட்டுள்ளது.

பாதுகாப்பு அமைச்சின் கீழ் கடற்படையினர் மன்னாரில் புதிதாக முகாம் அமைப்பது தொடர்பில் கடற்படைத் தளபதியை சந்திக்க அனுமதி கோரினால் பாதுகாப்பு அமைச்சின் அனுமதியுடன் சந்திக்குமாறு கூறுகின்றார். அதன் பிரகாரம் பாதுகாப்பு அமைச்சிற்கு விண்ணப்பித்தால் அதற்கு பதிலே கிடையாது. அதுவரை அங்கே மீனவர்கள் தொழில்புரிய முடியாது தவிக்கின்றனர். இதனை எங்கு போய் கேப்பது. இதேநேரம் வடக்கிலே பாரிய உல்லாச விடுதிகள் பலவற்றினை இராணுவமே நடத்துகின்றது. அதேபோன்று வடக்கு கிழக்கில் நிலைகொண்டுள்ள பணையினர் தொழில் முயற்சியிலேயே ஈடுபடுகின்றனர்; என நாடாளுமன்ற உறுப்பினர் சார்ள்ஸ் நிர்மலநாதன் தெரிவித்துள்ளார்.


ஏற்கனவே இத்;தகைய குற்றச்சாட்டுக்களினை மாவை சேனாதிராசா முதல் சிறீதரன் ஈறாக முன்வைத்துவருகின்றமை குறிப்பிடத்தக்கது.
எனினும் படைத்தலைமை அழைக்கின்ற நிகழ்வுகளில் முன்வரிசையில் இதே அரசியல் தலைவர்கள் அமர்ந்திருப்பது குறிப்பிடத்தக்கது.
தமிழீழத்தின் திசைகளில் மோதும் காற்றில் கலந்துவிட்ட தென்றல்.

தமிழீழத்தின் திசைகளில் மோதும் காற்றில் கலந்துவிட்ட தென்றல்.

விடுதலைப் போராட்டத்தின் பல்வேறு பரிமாணங்களையும் தன்காலத்திலேயே நேரடியாகக் கண்ட மிகச் சில போராளிகளில் ஒருவன்.
தமிழீழத்தின் விடுதலைப் போராட்டம், எல்லாக் காலங்களிலும், கடல் பிரயாணங்களை முதன்மைப் படுத்துவதாக அமைந்தது. எத்திசையும் கடலால் சூழப்பட்ட எம்தாயகத்தின், தாக்கமுள்ள நகர்வுகள் கடல் மூலமே மேற்கொள்ளப்பட்டுள்ளன. எமது விடுதலைப் போராட்டத்தில், கடல் பயணங்கள் பிடித்திருந்த இடத்தின், அதே அளவு இடத்தை, எமது கடல் சரித்திரத்தில் டேவிட் பிடித்திருந்தான்.
அவனது இளமையிலேயே கடல் அவனை அழைத்தது. அவது குடும்பநிலை அவனை கடலுக்கு அனுப்பியது.
”இயக்கம் கடலிலும் பிரயாணம் செய்ய வேண்டிவரும்” என்ரகாலம் போய், ”இயக்கத்தின் பியானம் கடலில்தான்” என்று வந்துவிட்ட 83ல், இயக்கத்திற்க்காய் கடலில் இறங்கினான்.
தமிழீழத்தின் ஒவ்வொரு கரையிலும் கால் பதித்தான். நீண்ட பெரும் கடற்பரப்பு, கடற்பரப்பில் புள்ளியாய் நகரும் படகு, படகினைப் போல் பலமடங்கு விரிந்து , எழுந்து, விழுங்கவரும் அலைகள். சமுத்திர ராட்சதனின் அலைவாய் மூடமுதல், விரைந்து , தத்திப்பாய்ந்து வெளியேறி, திரும்பிப்பார்க்கும் லாவசம். திரும்பிப்பார்வை நேரே நோக்க அடுத்த பெரும் அலை.
படகினை பலமடங்கு வேகத்துடன் துரத்தி உமிழும் பீரங்கிவாய்கள். அவற்றின் பல்முக நகர்வுகளிலும் தப்பி, தத்திச் செல்லும் வேகம். பின்னால் வரும் எதிரியின் கை அதிகமாய் நெருங்கின், நின்று – நிதானித்து இயந்திரத்துப்பாக்கியை இயக்க ஆணையிடும் உறுதி , அந்தக் கணத்தில் எதிரி அடையும் அதிர்ட்சி டேவிட்டை பல தடவைகள் கரை சேர்த்துள்ளது.
அவனது கடல் பயணங்கள் மெய்சிலிர்க்கும் பல அனுபவங்களைக் கொண்டது. அவனது ஆசான்களும், நல்ல நண்பர்களும் கடலிலேயே கலந்து விட்டனர். அப்போதெல்லாம் கூட, அவன் கடலில் நிலைத்துநின்றான். அவனது தப்பியோடும் லாவகமும், தேவையின் பொது எதிர்த்து நின்று எதிர்கொள்ளும் நெஞ்சுறுதியுமே அவனை நிற்கவைத்தது.
இன்று இயக்கத்தின் வசமுள்ள பெருமளவு ஆயுதங்களுக்கு டேவிட்டைத் தெரியும்.
ஆம்…! அவை எமது கைகளுக்கு கிடைப்பதற்கு கிடையில் டேவிட் இருந்திருப்பான்.
அனேகமாக எப்போதுமே நாம் கரையில் காணும் டேவிட்டைக் கடலில் சந்திக்கமுடியாது. ஒருங்கிணைந்த சிந்தையுடன், தன்னை நம்பி படகில் ஏறிய ”நீந்தத் தெரியாத சுமைகளுக்கு” உத்தரவிடும் டேவிட், கடுமையான வசைகளால் ஓட்டிமாரை கட்டுப்படுத்தும் மாலுமி. கடலில் டேவிட்டை, டேவிட்டாகப் பார்ப்பது கடினம்.
எப்போதாவது மிக அபூர்வமாக, சீரான, நேவியில்லாத, ஒதுக்குப்புறக்கடலில், நல்ல நிலவும் சேர்ந்தால் அவனது படகு நிற்கும். இயந்திரச் சத்தத்தை மேவி அவன் குரல் ஒலிக்கும், ”கடல் மேல் பிறக்கவைத்தான்….” அவனது குரல் இனிய சங்கீதம் இல்லைத்தான், ஆனாலும் அவன் பாடினால் நின்று, நிதானித்துக் கேட்கவைக்கும் வசீகரம். அந்த வசீகரம் அவனது குரலுக்கா…? அல்லது அவன் பாடும் பாடல்களுக்கா…?
அவனது குரலில்; பாடல் கம்பீரம் பெறுவதும் தெரியும். அந்தக் குரலுக்கு, அவன் தெரிவு செய்யும் பாடல்களை விட, வேறுபாடல் எடுபடாதென்பதும் புரியும்.
அவனைத் தெரிந்த, அவனுடைய பழகாத எல்லோராலும் கூறப்படும், எண்ணப்படும், எண்ண வடிவங்களுக்கு அபபர்ப்பட்ட போராளி. அநேக போராளிகளைப் போல் அவனுக்கும் ”பழஞ்சோறு குழைத்துக்கையில கொடுக்கும் அம்மா” ”ஆமியின் வெடி கேட்டும் சிறுபற்றை சரசரக்காமல் தேத்தண்ணி செம்புடன் அண்ணனை , அண்ணனின் தோழர்களை தேடும் தங்கைகள்.” வீட்டின் நிலையை எண்ணுவதா? நாடா? என்ற கேள்விக்கு எப்போதுமே குழப்பமிலாத பதிலைத் தன்வசம் வைத்திருந்த போராளி. மிக நெருக்கமான நண்பர்களிடம் மட்டும் ” தங்கச்சியவை ” என்று கூறிக் கண்கலங்கும் அண்ணன்.
எப்பேற்பட்ட வேலையாக இருந்தாலும் அவ் வேலையின் முக்கியத்துவம் விளங்கவைக்கப்பட்டால் , அந்த வேலையை செய்து முடிக்கும்வரை அவன் ஓய்வதும் அபூர்வம். அவனது நினைவுகள் மீட்டப்படும் பொது திரும்பத்திரும்ப அவனது அக்குணநலனே எவருக்கும் முன்னிற்கும்.
தமிழீழத்தின் கடற்பரப்பில் மட்டுமல்ல, தமிழீழத்தின் தரைப்போர் வாழ்க்கையிலும் அவன் சாத்த்தவை அதிகம். அதிலும் வடமராட்சியில் நடைபெற்ற அநேகமான சண்டைகளில் அவனது சுவடுகள் பதிந்திருந்தன.
இந்திய இராணுவத்திற்கு முந்தைய போர்வாழ்வில், ஒப்பரேஷன் லிபறேசனுக்கு முன்பும் பின்பும் வடமராட்சியில் அவன் பங்கு அதிகம்.
ஒப்பரேஷன் லிபறேசனுகென ஆமி புறப்பட்டதிலிருந்து, நெல்லியடி முகாமிற்குள் மில்லர் புகுந்தது வரை அவன் ஓயவில்லை.
இந்திய இராணுவ யுத்தம் ஆரம்பித்த காலத்தில் தமிழ்நாட்டில் தங்கியிருந்தவன். யுத்தம் ஆரம்பித்து , கொழுந்துவிட்ட நேரத்தில் தள்ளியிருக்கமுடியாமல், ஒரு கட்டுமரத்தில் வந்து சேர்ந்தான். இந்திய ஆக்கிரமிப்புக் காலத்தில் வடமராட்சியில் இயக்கத்தை உயிர்த்துடிப்புடன் வைத்திருந்ததில், அவன் ப[அங்கு மிகப் பெரியது.
அனேகமாக இயக்கத்தின் எல்லாத் துறைகளிலும் தனது முத்திரையைப் பதித்தவன். அரசியல்? அவன் அரசியல் வித்தகன் இல்லைத்தான் எனினும் , தான் ஏந்திய துப்பாக்கி எதற்காக என்பதில் குழப்பமில்லாதவன். மக்களுடன் பழகும் போதினில் அந்த மக்களில் ஒருவனாக நின்று சிந்திக்கத் தெரிந்தவன்.
எல்லாத் தலைமறைவுக்கால வாழ்க்கையிலும், மக்களால் பாதுகாக்கப்பட்டவன். டேவிட் நின்றால் ஆமி பார்த்துச் சொல்வதற்க்கென ஒரு முதியோர் படையே திரளும்.
அவன் உலவும் ஊர்களில் சிறுகுழந்தைக்கும் அறிமுகமாகிவிடும் முகராசி. சிறுவர்களை ஒரு தடவை சந்தித்தால், மறுதடவை சந்திக்கும்போது அவர்களை பெயர் சொல்லி அழைக்கும் நட்புணர்வு அல்லது அவர்கள் வெட்கத்தில் முகம் சிவக்க இவன் ஒரு பெயர் வைத்திருப்பான். சிறுவர்கள் என்றல்ல எவருடனுமே நட்பைப் பேணுவதில் தனித்துவமானவன், பழைய நண்பர்களை மீண்டும் சந்திப்பதில் தனிமையான ஆர்வமுள்ளவன்.
எப்போதோ ஒருமுறை ”வண்டி விடப்பட்ட கரையில்” லாம்பு வெளிட்சத்தில் சாப்பாடு கொடுத்தவரை யாழ்ப்பாணத்தில் கண்டு ”என்னைத் தெரியேல்லையே, கலுவன் கேணியில றால் கரியோட புட்டு சாப்பிட்டனாங்கள் எல்லே” என்று கேட்டு அசத்துவான்.
பழைய நண்பர்கள் ஒன்றாகச் சேர்ந்தால், மறந்துவிட்ட திரும்பக் கிடைக்காத நினைவுகளை மீட்டுவது டேவிட்தான். இவனது நட்பைப் பேணும் பண்பால் பலராலும் விரும்பபட்டவன். சிலவேளைகளில் வேலை நேரங்களிலும் ”நட்பைப் பேணப்போய்” வாங்கிக்கட்டிக் கொண்டு தலையைச் சொறிவான்.
இயக்கம் மிக அரிதாகச் சந்தித்த ”எல்லா வேலைகளிலும் வல்லுனர்களாக விளங்கக்கூடிய” சிலரில் டேவிட் ஒருவன். ஆனால் கடல் என்பது ”பெரிய கடலாக” இருந்தது. அதில் இயக்கத்தின் கடற்பிரிவு மிகச்சிறியதாக இருந்ததால் அவனால் காதலி விட்டுவிட்டு வரமுடியவில்லை. அவனது குறைந்த பாடசாலைக் கல்வியின் போதும்கூட பெரிய திட்டமிடல் திறன் இருந்தது. அது புரிந்தவர்கள் எண்ணிக்கை குறைவாகவே இருந்தது.
அவனது எதிர்பார்ப்புகளுக்கெல்லாம் அவனுக்கு களம் கிடைக்கவில்லை. கடல் அவனை மறித்துவைத்திருந்தது.
ஒரு மிக முக்கிய கடற்பயணம் , தவை பெரியது, டேவிட் தேவையான ஒழுங்குகளை வழமைபோல் சரிபார்க்கிறான். கடல் தெரிந்தவர்கள் கடலில் ஓடத்தயங்கும் காலநிலை, ஆனாலும் பிரயாணம் அவசியமானதாகவும் , ஒத்திவைக்க முடியாததாகவும் இருந்தது.
கடலைத் தவிர எல்லாமே வழமைபோலத்தான். வழமையான தடபுடல் வேகமான பிக்கப்….. , பெரிய நம்பிக்கை விதையை நெஞ்சில் விதைத்துவிட்டு டேவிட் ஆயத்தமாகிறான். வழமையாக ஓடித்திரியும் நேவியையும் காணவில்லை. எல்லாமே நம்பிக்கையுடன் இருக்கிறது. வண்டி புறப்படும் , அதுவும் டேவிட் நேரில் புறப்படும் காரணம் சொல்லப்படாவிட்டாலும், வழமைபோலவே ஊகித்துக் கொண்டு வழியனுப்புகிறார்கள். டேவிட்டை அன்புடன் வளர்த்துப் பாதுகாத்த மக்கள் அவனுடன் மிக அன்பாகப் பழகியவர்களில் நல்லாய்க் கடல் தெரிந்தவர்கள் அன்று கரைக்கு வரவேயில்லை…..
படகு நீரில் இறங்கியது ”குழந்தைப்பிள்ளையைக் கையிலே பிடித்துக் கூட்டிச் செல்லும் வாஞ்சையுடன்” இரு கரையிலும் ஆட்கள் வரிசையாய் நின்று , படகினை கடலுக்குள் இழுத்துச் செல்கிறார்கள். இடுப்பளவு தண்ணீரில் இறங்கிய பின்னர், அணியத்தில் நின்ற அரி தடியால் ஊன்ற படகு தள்ளாடி, நகர, அண்ணார்ந்து நின்ற இயந்திரவால்கள் தண்ணீரில் குளிக்க, எல்லாம் வழமைபோலவே.
”நல்லாய் செவிச்போட்ட இயந்திரம் ஒரு இழுவையில் ஸ்ராட் வர” இருட்டில் நின்ற தோழர்களும், மக்களும் வண்டியில் நின்றவர்களுக்கு ”தெரியாது என்று தெரிந்தும்” கையை உயர்த்தி மேல அசைகிறார்கள். வண்டியில் நின்றவர்களும் கையசைத்திருப்பார்கள்….?
ஒரு இயந்தியம் கொஞ்சத்தூரம் ஓடிப்போய் நின்று தயாராகையில், ”துணியில் பொத்தி ரோச்லைட் அடிப்பதும்” தெரிகிறது.
அல்பா , அல்பா…..
என்னமாதிரி….?
பிரச்சினையில்லை குதிரைக்கு சாப்பாடு கொடுக்கினம்…..
கரிகாலனின் பதில் வோக்கியில் கேட்கிறது.
பின் ஒவ்வொரு இயந்திரமாக சத்தமிட படகு நகராமலேயே இயந்திர சத்தம் அதிகரித்து குறைந்தது , மிக அதிகரித்து , தணிவது கேட்கிறது.
படகு வழமைபோல் வலப்புறமாய் வட்டமிட்டு, நிழலாய் நகர்கிறது. ”எப்போதும் போல், ‘தேவையும் கடலும் தவிர‘ மற்ற எல்லாம் வழமைபோல்”
நீரைக்கிழித்து , வெண்நுரை கிளப்ப, அலையில் எழும்பிப்பாய்ந்தது….. படகு புறப்பட்டுவிட்டது. அதிகரித்த சத்தமும். கரையில் கூடிய கூட்டமும், சிறிது சிறிதாய் மறைய, கடல் தெரியாதவர்களின் திருப்திப் பெருமூச்சுடன் ” கலந்தபோது, ”வண்டி வெளிகிட்டு விட்டது.”
இயந்திர சத்தம் கரைவடஹ்ர்க்கு முன்னரே கரையிலுள்ள வோக்கி.
அல்பா…… அல்பா….. என அழைத்தது.
”தண்ணியடிக்குது தானே வோக்கியை அது தான் லோக் ரியூப்பிலை வைத்திட்டினம் போல” எனக் கூறிவிட்டு , முயற்சியைக் கைவிடும் போதும் கூட, இயந்திர சத்தம் கேட்டுக்கொண்டுதானிருக்கிறது.
நேரம் கரைய, முகாமுக்குத் திரும்ப நினைக்கும் வேளையில், துரத்து முகாம் வோக்கியில் ஒரு அவசர அழைப்பு. ”வோக்கியில் அல்பா தொடர்பெடுத்து…..”
”என்னவாம்“…..
”கிளியரில்லை , சரியாக விளங்கேல்லை பிறபோ…… பிறபோ…… என்று அவியல் கூப்பிட்டமாதிரியிருந்தது…..
”சொல்லு“….
”போட்வெடித்திட்டு , வண்டி அனுப்புங்கோ , ஏன்டா மாதிரிக் கிடந்தது. அவையளின்ர கிளியரில்லை , ஒண்டும் விளங்கேல்லை “……
”ஆர் கதைச்சது….”
”டேவிட் அண்ணை மாதிரித்தான் கிடந்தது , ஒண்டும் விளங்கேல்லை …..”
அடுத்த படகினை ஆயத்தம் செய்தவேளை , இயந்திரம் எடுக்க பிக்க[ விரைந்த வேளை , உறுதியற்ற வோக்கிச் செய்தியை நம்புவதா , இல்லையா என்று யோசித்தவேளை , நேரம் நகர்ந்து கொண்டிருந்தது. அலை விரித்துக் கொண்டிருந்தது.
”சன்னதம் கொண்டு நின்றது கடல். தேடபோகும் படகினை , தேடப்போகவென மர்ரபடகை , தயாராக வைக்கக் , வைக்கும் கடல்…!
நேரம் செல்லச்செல்ல ” வேக்கிச் செய்தி பிரமையோ ? ” எனநினைக்க வைக்கும் , வெறுமையுடன் காத்திருக்கும் வேளையில் , தேடப்போன படகின் வோக்கி அழைக்கிறது.
அரியைக்கண்டிட்டம் , தூரத்தின் இன்னொமொரு ஆள் தெரியுது….
என்னமாதிரி….. என்னமாதிரி என்ற வோக்கிக்கு பதில் சொல்லாமல் தேடும் படகு கரைநோக்கி வர. ” படகில் அரியுடன் ரட்ணா ”
”என்ன நடந்தது ? ”
”போட பிரிஞ்சிட்டுது , நடுவாலை முறிஞ்சு அணியம்தனிய , கடயார்தனிய ரெண்டாகப் போச்சு”
”மற்றாக்கள் என்ன மாதிரி ? டேவிட் அண்ணை என்ன மாதிரி ? ”
”இருட்டுக்குள் எல்லோரையும் கூபிட்டு டேவிட் அண்ணை ஒன்றாக்கினவர் , எல்லோரையும் நீந்தச்சொல்லிவிட்டுப்போட்டு , அவர் கரிகாலனைக் கூப்பிட்டு தன்னட்டை எடுத்தவர்.
முழுவிடயங்களையும் சொல்லமுடியாது அறியும் – ரட்னாவும் மயங்கிவிட்டார்கள்.
மீட்க்கப்பட்ட இருவரும் உப்பு நீரால் உதடுகள் வெடித்து., முகம் புண்ணாக்கி,” கோலம் கெட்டுப்போய் ” இருந்தார்கள்,
படகுகள் போயின , வந்தன. செய்தி கேள்விப்பட்ட சனமெல்லாம் கரைமுழுக்கக் கூடி நின்று தேடினர். படகுகளின் தேடுதலுக்கு மேலாக, டேவிட்டின் திறமையில் எல்லோரும் நம்பிக்கை கொண்டிருந்தனர்.
”முதலும் இரண்டு நாள் கடலுக்கு கிடந்தது, வந்து சேர்ந்தவன் தானே”
”மன்னாரிலை ஒருக்கா இரண்டு பொம்பிளைப் பிள்ளையளைத், தனியக் கொண்டுவந்து சேர்த்தவனெல்லெ”
டேவிட்டின் நீச்சல் திறமையில் எலோருக்கும் நம்பிக்கை இருந்தது.
”உந்த மட்டு மட்டு நீச்சல் பொடியல் வந்து சேர்ந்திட்டாங்களாம் டேவிட் ஏன் வரமாட்டான் ?”
எல்லோரும் நம்பிக்கையுடன் காத்திருந்த போதும் , அறி வைத்தியசாலியில் கூறிக்கொண்டிருந்தான்.” எங்களை நீந்தச்சொல்லிப்போட்டு கரிகாலனைத் தான், இழுத்துக் கொண்டு நீண்டவர்”
படகில் சென்றவர்களில் ”கடலுடன் கொஞ்சமும் பரிச்சயம் இல்லாத , நீச்சல் தெரியாதவன்” கரிகாலன் மட்டும் தான்.
எல்லோரும் நம்பிக்கையுடன் இருந்த போதும், அரியையும் – ரட்னாவையும் தவிர வேறு எவரும் வரவில்லை…..
கரிகாலன் வரவில்லை…..
டேவிட்டும் வரவில்லை …..
டேவிட் பங்குகொண்ட தாக்குதல்கள்…
* 1985ம் ஆண்டு மன்னார் போலிஸ் நிலையத்தாக்குதல் நடைபெற்றபோது, தாக்குதற் குழுவை படகில் ஏற்றி மறுகரைக்கு (மன்னார் தீவுக்குள்) கொண்டு சேர்க்கும் கடற்புலிகள் குழுவின் உதவிப்பொறுப்பாளராக இருந்தார். படகில் சென்று பாதுகாப்பாக இறங்குவதே தாக்குதலின் முதல் வெற்றி எனக் கருதப்பட்டது. இத்தாக்குதல் முடிந்த பின்பு அப்போதைய மன்னார்த் தளபதி லெப் கேணல் விக்ரர் அவர்களார் டேவிட் பாராட்டப்பட்டார்.
* 1987ம் ஆண்டில் ஆனையிறவு முகாமிலிருந்து யாழ்ப்பாணம் நோக்கி சிறிலங்கா இராணுவம் முன்னேற முயன்றபோது கிட்டு அண்ணா தலைமைதாங்கிய தாக்குதலின் பொது வீரமரணமடைந்த லெப் அங்கிளின் குழுவில் ஒருவராக சண்டை செய்து தோளில் காயமடைந்தார்.
* 1987ம் ஆண்டு யாழ் தொலைத்தொடர்பு நிலையத்தாக்குதலில் (8 இராணுவத்தினரைக் கைது செய்தபோது) ”50 கலிபர்” குழு ஒன்றுடன் சென்று சண்டையில் ஈடுபட்டார்.
* 1989க் ஆண்டு நெல்லியடியில் இந்திய இராணுவக் காவலரண் மீதான தாக்குதலின் போது அத்தாகுதற் குழுவின் இரண்டாவது பொறுப்பாளராகச் சென்றார்.
* 1990ம் ஆண்டு வடமராட்சிக் கடலில் சிறிலங்காக் கடற்படையின் தாய்க்கப்பல் மீது நடாத்தப்பட்ட கரும்புலித் தாக்குதல் (கடற்கரும்புலிகள் மேஜர் காந்தரூபன், கப்டன் வினோத், கப்டன் கொலின்ஸ்) நடவடிக்கையினை தலைமை தாங்கியவர் இவரே.
கொக்குவில் இந்து ஆசிரியர் மீது தாக்குதல் - கைதான இருவருக்கு விளக்கமறியல்

கொக்குவில் இந்து ஆசிரியர் மீது தாக்குதல் - கைதான இருவருக்கு விளக்கமறியல்


கொக்குவில் இந்துக் கல்லூரி ஆசிரியர் தாக்கப்பட்ட சம்பவத்துடன் தொடர்புடையவர் என்ற குற்றச்சாட்டில் கைது செய்யப்பட்ட இரண்டாவது சந்தேகநபரையும் வரும் 18ஆம் திகதிவரை விளக்கமறியலில் வைக்க யாழ்ப்பாணம் நீதிவான் நீதிமன்றம் நேற்று உத்தரவிட்டது.

கொக்குவில் இந்துக் கல்லூரின் ஒழுக்கக் கட்டுப்பாட்டு பொறுப்பாசிரியரும் உயர்தர கணித பாட ஆசிரியருமான நாடராஜா பிரதீபன் (வயது -41), கடந்த புதன்கிழமை மாலை பாடசாலைக்கு அண்மையாக வைத்து தாக்கப்பட்டார்.

இரண்டு மோட்டார் சைக்கிளில் வந்த 6 பேர் கொண்ட கும்பல் ஒன்றே அவர் மீது தாக்குதலை மேற்ககொண்டது என விசாரணையில் தெரிவிக்கப்பட்டுள்ளது. ஆசிரியர் வழங்கிய தகவலின் அடிப்படையில் நேற்று முன்தினம் காலை கொக்குவிலைச் சேர்ந்த இளைஞன் கைது செய்யப்பட்டார். விசாரணைகளின் பின்னர் அவர் யாழ்ப்பாணம் நீதிவான் நீதிமன்றில் முற்படுத்தப்பட்டார். அவரை வரும் 18ஆம் திகதிவரை விளக்கமறியலில் வைக்க நீதிமன்றம் கட்டளையிட்டது.

இந்த நிலையில் நேற்று முன்தினம் மாலை கைது செய்யப்பட்ட உடுவிலைச் சேர்ந்த இரண்டாவது சந்தேகநபர் யாழ்ப்பாணம் நீதிவான் நீதிமன்றில் நேற்று முற்படுத்தப்பட்டார். தாக்குதலுக்குள்ளான ஆசிரியர் வழங்கிய வாக்குமூலத்தின் அதனடிப்படையிலேயே சந்தேகநபர் கைது செய்யப்பட்டார். ஏனையவர்களை கைது செய்ய உள்ளதால் சந்தேகநபரை விளக்கமறியலில் வைக்கவேண்டும்  என்று பொலிஸார் மன்றில் சமர்ப்பணம் செய்தனர்.

தாக்குதலுக்கும் சந்தேகநபருக்கும் தொடர்பில்லை என்று சந்தேகநபர் சார்பில் முன்னிலையான சட்டத்தரணி மு.றெமிடியஸ் மன்றில் சமர்ப்பணம் செய்தார். இருதரப்பு விண்ணப்பங்களையும் ஆராய்ந்த நீதிவான் சி.சதீஸ்தரன், சந்தேகநபரை வரும் 18ஆம் திகதிவரை விளக்கமறியலில் வைக்க உத்தரவிட்டார்.
இறந்ததாக இருதடவை இறுதிச் சடங்கு ஏற்பாடு செய்த குழந்தை - 4 நாட்களின் பின் மருத்துவமனையில் அனுமதி

இறந்ததாக இருதடவை இறுதிச் சடங்கு ஏற்பாடு செய்த குழந்தை - 4 நாட்களின் பின் மருத்துவமனையில் அனுமதி


காய்ச்சால் காரணமாக இரண்டு வாரங்களாக வைத்தியசாலைகளில் சிகிச்சை பெற்று பயனின்றி உயிரிழந்ததாக யாழ்ப்பாணம் போதனா வைத்தியசாலையால் கூறப்பட்ட இரண்டரை வயது பெண் குழந்தை இரண்டு நாள்களின் பின் இன்று தனியார் வைத்தியசாலையில் மீளவும் சேர்க்கப்பட்டுள்ளார் என உறவினர்கள் தெரிவித்தனர்.

சுன்னாகம் பொலிஸ் பிரிவுக்குட்பட்ட உடுவில் ஆலடிப் பகுதியைச் சேர்ந்த பெண் குழந்தையே இவ்வாறு தனியார் வைத்தியசாலையில் சேர்க்கப்பட்டுள்ளார். இரண்டரை வயது பெண் குழந்தை காய்ச்சல் பாதிக்கப்பட்டாள். குழந்தையை தெல்லிப்பளை வைத்தியசாலையில் பெற்றோர் சேர்த்துள்ளனர். அங்கு குழந்தைக்கு 4 நாள்கள் சிகிச்சையளிக்கப்பட்டது. எனினும் காய்ச்சல் நீடித்தமையால் பாலகி யாழ்ப்பாணம் போதனா வைத்தியசாலைக்கு மாற்றப்பட்டுள்ளார். அங்கு 11 நாள்கள் சிகிச்சை வழங்கப்பட்டது. இந்த நிலையில் நேற்றுமுன்தினம் புதன்கிழமை இரவு குழந்தை உயிரிழந்துவிட்டார் என மருத்துவ அறிக்கையிடப்பட்டது.

குழந்தை உயிரிழந்துவிட்டதாக புதன்கிழமை
நள்ளிரவு உறவினர்களிடம் வைத்தியசாலையில் ஒப்படைத்தனர். குழந்தையின் இறுதிச் சடங்கு நேற்றுமுன்தினம் (7) வீட்டில் நடைபெற்றுள்ளது. முற்பகல் 11 மணியளவில் குழ்ந்தையின் சடலத்திலிருந்து மலம், சலம் வெளியேறியுள்ளது. அதனால் குழந்தை உயிருடன் உள்ளது என சிலரால் நம்பிக்கை வெளியிடப்பட்டது.

அதனையடுத்து குழந்தை தேவாலயத்துக்கு எடுத்துச் செல்லப்பட்டு வழிபாடு நடத்தப்பட்டது. பின்னர் இந்து முறைப்படி வழிபாடும் நடைபெற்றுள்ளது. எனினும் குழந்தை உயிரிழந்துவிட்டது என பெரியோர்கள் பெற்றோருக்கு எடுத்துக் கூறினர். அதனையடுத்து குழந்தை வீட்டுக்கு எடுத்துச் செல்லப்பட்டது. இறுதிச் சடங்கு இன்று நடைபெறும் என உறவினர்கள் தெரிவித்தனர். இந்த நிலையில் இன்றும் திருப்பம் ஏற்பட்டது.

இறுதிச் சடங்கு இடம்பெறவிருந்த நிலையில் குழந்தை நேற்றும் மலம் சலம் கழித்துள்ளார். அதனால் அவர் தனியார் வைத்தியசாலையில் சேர்க்கப்பட்டுள்ளார். எந்த வைத்தியசாலை என வெளியில் தெரிவிக்க நாம் விரும்பவில்லை. எந்த தகவல் என்றாலும் நாளை கூறுகின்றோம்  என்று உறவினர்கள் தெரிவித்தனர்.

இந்தச் சம்பவம் தொடர்பில் குடும்பத்தினருடன் தொடர்புகொண்ட போதே இந்த தகவல் வழங்கப்பட்டது. எனவே குடும்பத்தினர் குழப்பநிலையில் உள்ள போது, அவர்களை மேலும் அழுத்தத்துக்கு உள்படுத்தவிரும்பவில்லை.
மானிப்பாயில் ரவுடிகள் அட்டகாசம் - வீடு புகுந்து வாள்வெட்டு

மானிப்பாயில் ரவுடிகள் அட்டகாசம் - வீடு புகுந்து வாள்வெட்டு

மானிப்பாய் சம்மந்தப் பிள்ளையார் கோவிலுக்கு அண்மையாக உள்ள வீடொன்றுக்குள் புகுந்த வாள்வெட்டுக் கும்பல், முச்சக்கர வண்டி மற்றும் வீட்டு கண்ணாடி யன்னல்களை அடித்து சேதப்படுத்தி அட்டூழியத்தில் ஈடுபட்டுத் தப்பித்துள்ளது என மானிப்பாய் பொலிஸார் தெரிவித்தனர்.

இந்தச் சம்பவம் நேற்று (08) பிற்பகல் இடம்பெற்றது. இரண்டு மோட்டார் சைக்கிளில் 6 பேர் கொண்ட கும்பல் வந்தது. வீட்டின் வாசல் படலையை கூரிய ஆயுதல்களால் தாக்கி கும்பல் சேதப்படுத்தியது. வீட்டு முற்றத்தில் தரித்து நின்ற முச்சக்கர வண்டியை அடித்து சேதப்படுத்திய கும்பல், வீட்டின் யன்னல்கள் கண்ணாடிகளையும் கூடிய ஆயுதங்களால் தாக்கிவிட்டு தப்பித்தது என்று வீட்டின் உரிமையாளரால் செய்யப்பட்ட முறைப்பாட்டில் தெரிவித்துள்ளார்.

அந்தக் குடும்பத்தை அச்சுறுத்தும் வகையிலேயே வாள்வெட்டுக் கும்பல் ஒன்று இவ்வாறு அட்டூழியத்தில் ஈடுபட்டுள்ளது. சந்தேகநபர்கள் விரைவில் கைது செய்யப்படுவர் என்று பொலிஸார் மேலும் தெரிவித்தனர்.

சம்பவம் தொடர்பில் மானிப்பாய் பொலிஸார் விசாரணைகளை முன்னெடுத்துள்ளனர்.

Friday, June 8, 2018

சுமந்திரன் முதலில் வருவாராம்?

சுமந்திரன் முதலில் வருவாராம்?


தனது சட்டப்பாண்டியத்தில் நம்பிக்கை வைத்து மருதங்கேணியில் அடாத்தாக தங்கியுள்ள தென்பகுதி மீனவர்களை வெளியேற்ற சட்டரீதியான நடவடிக்கை எடுக்கப்போவதாக எம்.ஏ.சுமந்திரன் தெரிவித்துள்ளார். அதற்கு மருதங்கேணி மீனவர்கள் ஒத்துழைப்பு வழங்கவேண்டும் அதனை மீறி வாடிகளை பிடுங்கி எறிவதற்கு செல்ல கூடாது. வாடிகளை பிடுங்கி எறிவதற்கான காலம் இதுவல்ல. அப்படி ஒரு காலம் வந்தால் நானே முதல் ஆளாக வந்து வாடிகளை பிடுங்கி எறிவேனெனவும் அவர் தெரிவித்துள்ளார்.

வடமராட்சி கிழக்கில் அரச காணியில் அடாத்தாக தங்கியிருந்து கடலட்டை பிடிப்பதற்கான நிபந்தனைகளை மீறி சுமார் 1500ற்கும் மேற்பட்ட மீனவர்கள் கடற்றொழில் செய்து வருகின்றனர். இதனால் எமது மீனவர்கள் பல்வேறு பாதிப்புக்களை எதிர்கொண்டிருக்கிறார்கள். இது தொடர்பாக கடந்த ஞாயிற்றுகிழமை பிரதமரை சந்தித்து விடயங்களை கூறியிருக்கின்றோம்.

அதேபோல் கடந்த செவ்வாய்கிழமை புதிய கடற்றொழில் அமைச்சரை நானும் நாடாளுமன்ற உறுப்பினர் மாவை சேனாதிராஜாவும் சந்தித்து விடயங்களை கூறியிருக்கின்றோம். இதனடிப்படையில் கடலட்டை பிடிப்பதற்கான நிபந்தனைகளை உரிய முறையில் கடைப்பிடிக்கும்படி புதிய கடற்றொழில் அமைச்சர் கடற்றொழில் பணிப்பாளருக்கு கூறியிருக்கின்றார்.
ஆனாலும் அது கடைப்பிடிக்கப்படவில்லை. அதனை கண்டித்தே இன்று நாங்கள் முற்றுகைப் போராட்டத்தை நடத்தியிருக்கின்றோம். இதன்போது கடலட்டை பிடிப்பதற்கான நிபந்தனைகளை உரியமுறையில்  கடைப்பிடிப்பதாகவும், மீறுவோர் மீது சட்டநடவடிக்கை எடுப்பதாகவும் கடற்றொழில் நீரியல் வளத்துறை திணைக்கள அதிகாரிகள் உறுதிபட கூறியுள்ளனர்.

ஆகவே நாங்கள் முற்றுகைப் போராட்டத்தை நிறுத்தியுள்ளோம்.  ஆக்கபூர்வமான நடவடிக்கை எடுக்கப்படாவிட்டால் மீண்டும் திங்கள்கிழமை தொடக்கம் முற்றுகைப் போராட்டம் நடாத்தப்படும். அது தொடர்ச்சியாகவும் நடாத்தப்படவுள்ளது. தென்பகுதி மீனவர்களின் வாடிகளை பிடுங்கி எறிவதற்கெல்லாம் போகவேண்டாம். அதற்கான சந்தர்ப்பம் இதுவல்ல. பிடுங்கி எறிவதற்கான சந்தர்ப்பம் வந்தால் நானே முன்வந்து வாடிகளைப் பிடுங்கி எறிவேன் என்றார்.

முன்னதாக சுமந்திரன் ஆஜராகி வாதிட்ட உதயன் -டக்ளஸ் அவமதிப்பு வழக்கு,பல்லைக்கழக மாணவர்கள் படுகொலை வழக்கென அனைத்துமே ஊத்தி மூடிக்கொண்டமை தெரிந்ததே.

ஆண்டனி பௌர்டன் தற்கொலை

ஆண்டனி பௌர்டன் தற்கொலை


பிரபல சமையல் கலைஞர், எழுத்தாளர், சின்னத்திரை பிரபலம் என பன்முகத்தன்மை கொண்ட அண்டனி பௌர்டன் (Anthony Bourdain) தனது 61 ஆவது வயதில் தற்கொலை செய்து கொண்டார்.

அமெரிக்காவைச் சேர்ந்த ஆண்டனி, உலகம் முழுவதும் 80-க்கும் அதிகமான நாடுகளில் பயணித்து, சிறந்த உணவு மற்றும் பானங்கள் குறித்து நிகழ்ச்சிகளை நடத்தி புகழ்பெற்றவர் ஆவார். 

ஏராளமான விருதுகளையும் வென்ற இவர், சமையல் குறித்த பார்ட்ஸ் அன்நோன் (Parts Unknown ) என்ற பெயரிலான நிகழ்ச்சி, அமெரிக்காவின் சிஎன்என் தொலைக்காட்சியில் 10 சீசன்களைக் கடந்து 11 வது சீசனாக ஒளிபரப்பாகி வருகிறது.

இதற்கான படப்பிடிப்புக்காக பிரான்சின் ஸ்ட்ராஸ்பர்க் (Strabourg) நகருக்குச் சென்றிருந்த அவர், விடுதி அறையில் சடலமாக மீட்கப்பட்டார். 

அவர் தற்கொலை செய்து கொண்டதாக CNN தொலைக்காட்சி உறுதி செய்துள்ளது. மிகச் சிறந்த நண்பரும், சக பணியாளருமான ஆண்டனியின் மறைவு, தங்களுக்கு பேரிழப்பு எனவும் சிஎன்என் தெரிவித்துள்ளது.
தூத்துக்குடி துப்பாக்கிச்சூட்டிற்கு உத்தரவிட்ட துணை வட்டாட்சியர் இடமாற்றம்

தூத்துக்குடி துப்பாக்கிச்சூட்டிற்கு உத்தரவிட்ட துணை வட்டாட்சியர் இடமாற்றம்


தூத்துக்குடியில், ஸ்டெர்லைட் ஆலைக்கு எதிரான போராட்டத்தின்போது, துப்பாக்கிச்சூடு நடத்த உத்தரவிட்ட துணை வட்டாட்சியர் உள்ளிட்ட 3 பேர் பணியிட மாற்றம் செய்யப்பட்டுள்ளனர்.

தூத்துக்குடியில் கடந்த மே மாதம் 22ஆம் தேதி ஸ்டெர்லைட் ஆலைக்கு எதிரான போராட்டம் வன்முறையாக மாறியதை துணை வட்டாட்சியர்கள், கண்ணன், சேகர், ஆகியோர் துப்பாக்கிச் சூட்டிற்கு உத்தரவிட்டதாக முதல் தகவல் அறிக்கையில் தெரிவிக்கப்பட்டுள்ளது. 

இந்த நிலையில், துணை வட்டாட்சியர் கண்ணன், கயத்தார் துணை வட்டாட்சியராகவும், மற்றொரு தனித்துணை வட்டாட்சியரான சேகர், ஸ்ரீவைகுண்டம் வட்டாட்சியராகவும் பணியிடமாற்றம் செய்யப்பட்டுள்ளனர்.

மேலும், தாசில்தார் சந்திரன் துணை வட்டாட்சியர் அந்தஸ்தில் உள்ள அதிகாரிகள் 6 பேரும் பணியிட மாற்றம் செய்யப்பட்டுள்ளனர்.இரண்டாவது நாள் துப்பாக்கிச்சூட்டிற்கு உத்தரவிட்ட கோட்ட கலால் அலுவலர் எஸ்.சந்திரன், தூத்துக்குடி, நகர நிலவரித் திட்ட தனி வட்டாட்சியராக பணி மாறுதல் செய்யப்பட்டுள்ளார்.
ஊடகங்களுக்கு அறிவில்லை:அறிவாளி சுமந்திரன் !

ஊடகங்களுக்கு அறிவில்லை:அறிவாளி சுமந்திரன் !



ஊடகங்கள் மீது தொடர்ச்சியாக வசைபாடி வரும் சிறிலங்காவின்  நாடாளுமன்ற உறுப்பினர் எம்.ஏ.சுமந்திரன் இன்றைய தினம் அறிவில்லாத ஊடகங்கள் என ஊடகவியலாளர்களை பார்த்து விமர்சித்துள்ளார்.
வடமராட்சி கிழக்கில் அடாத்தாக தங்கியுள்ள தென்பகுதி மீனவர்களை வெளியேற்றக்கோரி இன்று காலை யாழ்.கடற்றொழில் நீரியல் திணைக்களம் முற்றகையிடப்பட்டது.
இதன்போதே சிறிலங்காவின் நாடாளுமன்ற உறுப்பினர் எம்.ஏ.சுமந்திரன் மேற்கண்டவாறு கூறியுள்ளார்.

இன்றைய போராட்டத்தின் நிறைவில் நீரியியல் வளத்திணைக்கள பணிப்பாளர் தலைமையிலான குழுவினர் போராட்டக்காரர்களை வந்து சந்தித்துக்கலந்து ரையாடியிருந்தனர்.

இதன்போது போராட்டக்கார்களுடன் நாடாளுமன்ற உறுப்பினர் எம்.ஏ.சுமந்திரனும்; நீரியியல் வளத்திணைக்கள அதிகாரிகளுடன் பேசிக்கொண்டிருந்தார். அப் பேச்சுவார்த்தையின் போது அத்துமீறிய தொழிலாளர்களை தாம்  கடலில் வைத்து பிடிப்பதாக நீரியல் வளத்திணைக்கள அதிகாரிகள் போராட்டக்காரர்களிடம் தெரிவித்தனர். இதன் போது குறிக்கிட்ட சுமந்திரன் பிடிப்பதாக அறிவித்துவிட்டு பிடித்தால் அவர்கள் அதிலிருந்து தப்பிப்பதற்கு வாய்ப்பிருக்கின்றது என்று கூறினார்.

மேலும் தற்போது தென்னிலங்கை மீனவர்கள் பிடிக்கப்பட இருக்கின்றனர் என்ற செய்தியை ஊடகங்கள் இப்போதே வெளிப்படுத்தி விடுவார்கள். புத்தியில்லாத ஊடகங்கள் தான் இருக்கின்றது என்று மீண்டுமொருமுறை ஊடகங்கள் தொடர்பில் கருத்து தெரிவித்துள்ளார்.
ஒரு நாள் போட்டியில் புதிய சாதனை: நியூசிலாந்து அணியின் அபார இலக்கு

ஒரு நாள் போட்டியில் புதிய சாதனை: நியூசிலாந்து அணியின் அபார இலக்கு


அயர்லாந்துக்கு சுற்றுப்பயணம் மேற்கொண்டு விளையாடிவரும் நியூசிலாந்து அணி சர்வதேச மகளிர் ஒருநாள் கிரிக்கெட் போட்டியில் 490 ஓட்டங்களை குவித்து புதிய சாதனை படைத்துள்ளது.

அயர்லாந்துக்கு எதிரான நடைபெற்றுவரும் முதல் ஒருநாள் போட்டியில் நாணய சுழற்சியில் வெற்றி பற்ற நியூசிலாந்து அணி முதலில் துடுப்பெடுத்தாட தீர்மானித்தது.

அதன்படி களமிறங்கிய அணியின் தலைவர் பேட்ஸ் 94 பந்துகளில் 151 ஓட்டங்களை குவித்தார். மேலும் அணியின் மாற்ற வீராங்கனை கிரின் 77 பந்துகளில் 121 ஓட்டங்களை சேர்த்தார்.

மேலும் அமெலா கெர் 45 பந்துகளில் 81 ஓட்டங்களை விளாசினார். இதனால் 50 ஓவர் முடிவில் நியூசிலாந்து அணி 4 விக்கெட் இழப்பிற்கு 490 ரன்கள் குவித்து உலக சாதனை படைத்தது.

இதற்கு முன்னர் 1998 ஆம் ஆண்டு நடைபெற்ற பாகிஸ்தானுக்கு எதிரான ஒருநாள் போட்டியில் நியூசிலாந்து அணி 455 ஓட்டங்களை குவித்ததே மகளிர் கிரிக்கெட்டில் முதல் சாதனையாக இருந்தது.

தற்போது நியூசிலாந்து அணி தனது சாதனையையே முறியடித்து புதிய சாதனையை நிலைநாட்டியுள்ளமை குறிப்பிடத்தக்கது.

எரிபொருள் விலை திங்கள் முதல் குறைவடையும்...! முக்கிய அறிவிப்பு..>!

எரிபொருள் விலை திங்கள் முதல் குறைவடையும்...! முக்கிய அறிவிப்பு..>!


மண்ணெண்ணெய் விலை எதிர்வரும் தினங்களிற்குள் குறைவடையும் என கடற்றொழில், நீரக வளமூல அபிவிருத்தி மற்றும் கிராமியப் பொருளாதார அலுவல்கள் இராஜாங்க அமைச்சர் திலிப் வெதஆரச்சி தெரிவித்துள்ளார்.

மீனவர்கள் எதிர்நோக்கும் பிரச்சினைகள் காரணமாக இந்த நடவடிக்கையை அரசாங்கம் எடுக்கப்பட்டுள்ளதாக அவர் கூறினார்.

அதன்படி எதிர்வரும் திங்கட்கிழமை முதல் ஒரு லீட்டர் மண்ணெண்ணெய் விலை 25 தொடக்கம் 30 ரூபாவினால் குறைவடையக்கூடும் என அவர் மேலும் தெரிவித்துள்ளார்.

எரிபொருள் விலை அதிகரிப்பை தொடர்ந்து நாட்டில் பல்வேறு இடங்களில் மீனவர்கள் போராட்டம் நடாத்திவந்த நிலையில் இந்த முடிவு எடுக்கப்பட்டுள்ளது.
கூட்டமைப்பு- முன்னணி ஆதரவாளா்களுக்கிடையில் முறுகல்!

கூட்டமைப்பு- முன்னணி ஆதரவாளா்களுக்கிடையில் முறுகல்!

கடலட்டை தொழிலை தடை செய்யக் கோரி யாழ்ப்பாணம் கடற்றொழில் நீரியல் வளத் திணைக்கள அலுவலகம் இன்று (08.06.2018) முற்றுகையிடப்பட்டது.

அதில் ஊடங்களுக்குக் கருத்துத் தெரிவித்த தமிழ்த் தேசிய மக்கள் முன்னணியின் பொதுச் செயலாளர் செ.கஜேந்திரன், கொழும்பில் அரசுக்கு முண்டு கொடுத்துக் கொண்டு இங்கு வந்து போராட்டம் நடத்துகின்றனர் என்று குறிப்பிட்டார்.

அதைக் கேட்ட தமிழ்த் தேசியக் கூட்டமைப்பு உறுப்பினர்கள் கொந்தளித்தனர்.


கூட்டமைப்பின் முன்னாள் பிரதேச சபை உறுப்பினராக பன்னீர்ச் செல்வம் “2010ஆம் ஆண்டுக்கு முன்னர் நீங்கள் அதைத்தானே செய்தீர்கள்” என்று கஜேந்திரனுடன் தர்க்கப்பட்டார். அதையடுத்து குழப்ப நிலை ஏற்பட்டுப் பின்னர் தணிந்தது.


32 சதுர Km களப்பை 21 சதுர Km ஆக குறைக்க துணை போகும் 3 பிரதேச செயலர்கள்!

32 சதுர Km களப்பை 21 சதுர Km ஆக குறைக்க துணை போகும் 3 பிரதேச செயலர்கள்!

தென் தமிழீழம் ,ஆலையடிவேம்பு, அக்கரைப்பற்று மற்றும் திருக்கோவில் ஆகிய பிரதேச செயலாளர் பிரிவுகளை உள்ளடக்கிய வகையில் ‘பெரிய களப்பு’  காணப்படுவதுடன் நாட்டில் காணப்படும் 116 களப்புகளில் பாரிய பரப்பளவுடைய களப்புகளின் அடிப்படையில் ஐந்தாம் இடத்தில் அம்பாறை – பெரியகளப்பு காணப்படுகின்றது.

கல்ஓயா விவசாய காணியிலிருந்து வௌியேறும் நீர் இரண்டு கழிமுகங்களூடாக பெரியகளப்பில் சேர்கின்றது.

இறால் வளம்மிக்க பெரிய களப்பில் வருடத்தின் பெப்ரவரி மற்றும் ஏப்ரல் மாதங்களில் இறால் பிடிப்பிற்காக வௌிமாவட்ட மீனவர்களும் வருகைதருவது வழக்கம்.

கடற்றொழில் மற்றும் நீரியல்வள திணைக்களத்தின் தரவுகளின் அடிப்படையில், இம்முறை பெரிய களப்பிலிருந்து நான்கு கோடி ரூபா பெறுமதியான இறால்கள் பிடிக்கப்பட்டுள்ளன.

பொருளாதார வளத்தின் அடிப்படையில் நோக்குமிடத்து கிழக்கு மாகாணத்தின் பொருளாதார வளங்களுக்குள் ஒன்றாக பெரியகளப்பு விளங்குகின்றது.

இவ்வாறு பெறுமதி வாய்ந்த களப்பாக காணப்படும் இந்த பகுதி தற்போது மண்ணிட்டு நிரப்பப்படுகின்றது.

இதனூடாக அந்த பகுதியில் சட்டவிரோத கட்டடங்கள் நிர்மாணிக்கப்படுகின்றன.

1996 ஆம் ஆண்டு இரண்டாம் இலக்க கடற்றொழில் மற்றும் நீரியல்வள சட்டத்தினூடாக களப்புகளின் உரித்து கடற்றொழில் திணைக்கள பணிப்பாளர் நாயகத்திடம் கையளிக்கப்பட்டுள போதிலும், அரச காணிகளுக்கான சட்டப்பூர்வ அதிகாரம் பிரதேச செயலகங்களிடம் வழங்கப்பட்டுள்ளது.

இதன் அடிப்படையில், பெரிய களப்பு அழிவடைவதற்கு ஆலையடிவேம்பு, அக்கரைப்பற்று மற்றும் திருக்கோவில் ஆகிய பிரதேச செயலாளர்களின் அசமந்தப்போக்கே காரணமாக அமைந்துள்ளது.

32 சதுர கிலோமீட்டர் பரப்பளவில் விசாலமாக பரந்து காணப்பட்ட பெரிய களப்பை 21 சதுர கிலோமீட்டராக குறைத்து முன்னெடுக்கப்பட்டுள்ள கையகப்படுத்தலை தடுத்து நிறுத்த வேண்டியது கட்டாயமானது
இராஜாங்க அமைச்சர் பாலித ரங்கே பண்டாரவின் மகன் கைது

இராஜாங்க அமைச்சர் பாலித ரங்கே பண்டாரவின் மகன் கைது

இராஜாங்க அமைச்சர் பாலித ரங்கே பண்டாரவின் மகன் யசோத ரங்கே பண்டாரவின் மகனுக்கு எதிர்வரும் ஜூன் 12 ஆம் திகதி வரை விளக்கமறியல் விதிக்கப்பட்டுள்ளது.

விபத்து ஒன்றின்போது, மது போதையில் வாகனம் செலுத்தியமை, அரச சொத்துக்கு சேதம் விளைவித்தமை உள்ளிட்ட குற்றச்சாட்டுகள் தொடர்பிலேயே அவர் இன்று (08) காலை கைது செய்யப்பட்டிருந்தார் என்பது குறிப்பிடத்தக்கது.

சந்தேகநபர் தொடர்பில், சிலாபம் நீதவான் நீதிமன்றிற்கு பொலிசார் அறிவித்திருந்த நிலையில், குறித்த விடயத்தை ஆராய்வது தொடர்பில் நுகேகொட நீதவான் நீதிமன்றுக்கு அறிவிக்குமாறு வேண்டுகோள் விடுத்தார் என தெரிவிக்கப்படுகின்றது.

சிலாபம் - புத்தளம் பிரதான வீதியில், ஆரச்சிக்கட்டு, கோட்டபிட்டிய சந்தியில் வைத்து, சந்தேகநபர் செலுத்திச் சென்ற, அமைச்சுக்குச் சொந்தமான கெப் ரக வாகனம் நேற்று முன்தினம் (06) அதிகாலை விபத்துக்குள்ளாகியிருந்தமை குறிப்பிடத்தக்கது.

வாகனத்தின் வேகத்தை கட்டுப்படுத்த முடியாத நிலையில், பாதையை விட்டு விலகி அருகிலிருந்த வீடொன்றில் மோதியதில் வாகனம் மற்றும் குறித்த வீடு ஆகியன பாரிய சேதத்திற்குள்ளானதாக பொலிசார் தெரிவித்தனர்.

சம்பவத்தில் காயமடைந்த யசோத ரங்கே பண்டார சிலாபம் வைத்தியசாலையில் அனுமதிக்கப்பட்டு அங்கிருந்து கொழும்பு தேசிய வைத்தியசாலைக்கு மாற்றப்பட்டார். அதனைத் தொடர்ந்து, அவர் தனது சுய விருப்பத்திற்கு அமைய ஶ்ரீ ஜயவர்தனபுர வைத்தியசாலையில் அனுமதிக்கப்பட்டார் என்பது குறிப்பிடத்தக்கது.